Palaý, mánti jáne laǵman jóninde komıkster: Astanada japon sýretshisiniń kórmesi ótip jatyr

Ortalyq Azııa elderiniń ulttyq taǵamdaryn tanystyratyn galereıa «Japon kóktemi» halyqaralyq óner festıvali aıasynda uıymdastyrylyp otyr. Іs-sharanyń maqsaty — aımaqtyń mádenıeti men ádet-ǵurpyn japon mangasy janrynda pash etý.

Eń aldymen, «manga» degen uǵymǵa túsinikteme bersek, ol — ıllıýstratsııa men sıýjettik baıandaýdan turatyn baǵyt. Japonııada manga jeke óner túri retinde sanalady jáne tarıh, fılosofııa, aspazdyq, kúndelikti ómirdegi jaıttar sekildi san alýan taqyryptardy qamtıdy.

Kórme keıipkerleri — qazaq, qyrǵyz, ózbek, tájik jáne túrikmen arýlary. Japon qurbysyna árqaısysy óz halqynyń ulttyq taǵamdary jóninde maǵlumat beredi. Palaý, laǵman, baýyrsaq tárizdi taǵamdardyń qalaı pisiriletinin kórsetý arqyly avtor Ortalyq Azııa elderiniń mádenıetin, dástúrin, qonaqjaılyq qasıetin de tanystyrady.

Bul jobanyń ózindik ereksheligi de bar. Sebebi, mangany kórkem óner úlgisi retinde ǵana emes, retseptiler kitapshasy dep te qabyldaýǵa bolady. Illıýstratsııalarda taǵamdardy ázirleý satylary, qandaı dámdeýishter qosylatyny, ár el ashanasynyń ózgeshelikteri egjeı-tegjeıli beınelengen.

— Aımaqtaǵy halyqtardyń keı dástúrleri ortaq. Bul — ulttyq taǵamdarǵa da qatysty másele. Mysaly, «mánti nemese palaý kimniń ulttyq asy?» — dep suraq qoısańyz, pikirtalas týyndap, ár el ózine tartar edi. Bárimiz kórshiles memleket bolǵandyqtan, mádenıetterimiz de ǵasyrlar boıy qatar qalyptasty, — deıdi «Japon kóktemi» festıvaliniń kórkemdik jetekshisi Tımýr Ormanshyev.

Onyń pikirinshe, tanymal japon sýretshisiniń Ortalyq Azııa aspazdyǵy taqyrybyna bet burýy — óńirge qyzyǵýshylyqtyń zor ekenin bildiredi.

— Kaorý Morı dál osy Ortalyq Azııa ulttyq taǵamdaryn beıneleýdi tańdaǵany meni tańǵaldyrdy. Demek, bizdiń mádenıetimizdi tanýǵa jáne tanytýǵa degen yntasy aıryqsha. Sýretshi manga arqyly elderimizdiń arasyndaǵy baılanysty nyǵaıtyp jatyr. Festıvaldiń negizgi maqsaty da — osy, ıaǵnı memleketter arasynda mádenı kópir salý, — deıdi Tımýr Ormanshyev.

Sonymen birge, súıikti asy qazaqtyń eti (beshbarmaq) ekenin atap ótti.

— Bul — mangaǵa enbegenmen, keremet taǵam. Qunarly ári toıymdy. Úlken ister tyndyrýǵa qýat pen shabyt beredi, — deıdi maman.

Onyń sózinshe, ulttyq taǵamdar halyqtardyń ózara túsinisýine septigin tıgizedi.

— As adamdardy biriktiredi. Birge tamaq pisirip, birge dastarhan jaısa, olardyń qarym-qatynasy kúsheıip, týys sekildi bolyp ketedi. Ásirese, qazaqtar úshin bul — erekshe joralǵy, — deıdi festıvaldiń kórkemdik jetekshisi.

Aıta ketetin jaıt — kórme Japonııa Syrtqy ister mınıstrliginiń qoldaýymen, «Japonııa + Ortalyq Azııa dıalogy» bastamasynyń mereıtoıyna oraı uıymdastyryldy. Іs-shara Japonııa men aımaq memleketteri arasyndaǵy mádenı jáne gýmanıtarlyq yntymaqtastyqty nyǵaıtady.

Japon tilindegi ǵajaıyp jumystar qonaqtardyń nazaryna qazaq, orys jáne aǵylshyn tilderine aýdarmasymen birge usynylady. Demek, elder arasyndaǵy dıalogty óner, dástúr jáne ulttyq taǵamdar arqyly damytady.

Kaorý Morı — manga janryndaǵy eń tanymal zamanaýı japon sýretshileriniń biri ekenin aıryqsha atap ótken jón.

Ol «Emma» degen mangasynyń arqasynda halyqaralyq deńgeıde tanyldy. Bul týyndy jelisimen anıme de jasalǵan.

Ónerpazdyń komıkster kórmesi elordadaǵy QR Ulttyq mýzeıinde 24 mamyrǵa deıin jalǵasady, ıaǵnı qala turǵyndary men qonaqtarynyń mádenı is-sharaǵa kýá bolyp, tamashalaýǵa múmkindigi bar.

Eske salaıyq, buǵan deıin Japonııada álemdegi alǵashqy Pokémon áýejaıy ashylatynyn jazǵanbyz.

Sonymen birge, Japonııada tolyǵymen robottar basqaratyn medıtsınalyq zerthana iske qosyldy.