Pákistannyń soltústigindegi sý tasqynynan keminde 194 adam mert boldy
ASTANA. KAZINFORM – Pákistannyń soltústiginde nóser jaýyn saldarynan bolǵan sý tasqynynan keminde 194 adam mert boldy. Bul týraly Geo News óńirdiń bılik ókilderine silteme jasap habarlaıdy.
Jańartylǵan aqparattarǵa qaraǵanda, tabıǵı apattan Haıber-Pahtýnhva aımaǵynda – 180, Gılgıt-Baltıstanda – 5, Azad-Kashmırde 9 adam kóz jumǵan.
Bılik dereginshe, kóshkin júrgen taýly aımaqta qalyp qoıǵan 1300 týrıst qutqarylyp, qaýipsiz jerge jetkizildi.
26 maýsymnan beri Pákistanda jaýyn-shashyn saldarynan bolǵan apattardan 360-tan asa adam qaza boldy, olardyń kópshiligi áıelder men balalar. Sońǵy adam ólimi derekteri negizinen Pákistannyń soltústigi pen soltústik-batys óńirlerinde tirkelip otyr.
Sý tasqyny kezinde kóptegen úıler qırap, keıbir aımaqtarda baılanys úzilgen. Sonymen qatar Haıber-Pahtýnhvada júk tıegen tikushaq qulap, ekıpajdyń bes múshesi mert boldy.
Bılik qaza tapqandar sany artýy múmkin ekenin eskertip, izdestirý-qutqarý jumystaryn jalǵastyryp jatyr.
Pákistan prezıdenti Asıf Alı Zardarı qaza bolǵandardyń jaqyndaryna kóńil aıtyp, apat saldaryn joıý jáne qutqarý sharalaryn jedeldetýdi tapsyrdy.
Osyǵan deıin Kashmırde sý tasqynynan 30-dan astam adam qurban bolǵany týraly jazdyq.