Pákistannyń Pendjab provıntsııasyndaǵy sý tasqyny: taǵy jarty mln adam evakýatsııalandy

ASTANA. KAZINFORM —  Pákistannyń shyǵysyndaǵy Pendjab provıntsııasynda kúshti mýssondyq jaýyn-shashyn saldarynan ózender arnasynan tasyp, sý deńgeıi qaýipti mejege jetti. Sońǵy 24 saǵatta taǵy da jarty mıllıonǵa jýyq adam qaýipsiz aımaqtarǵa kóshirildi, dep habarlaıdy Anadoly. 

Jergilikti bılik ókili Nabıl Djavedtiń habarlaýynsha, eń kóp zardap shekken óńirler — Mýzaffargarh pen Mýltan qalalary. Sońǵy eki aptada Ravı, Sýtledj jáne Chenab ózenderiniń tasýynan 3900 aýyl sý astynda qaldy.

Osylaısha, sońǵy evakýatsııalardan keıin bir aı ishinde úılerin tastap shyǵýǵa májbúr bolǵandardyń jalpy sany 1,8 mıllıonǵa jetti. Mýzaffargarh, Naroval jáne Kasýr qalalarynda ýaqytsha shatyrly lagerler qurylyp, onda azyq-túlik pen eń qajetti zattar taratylyp jatyr.

Jalpy alǵanda, Pendjabta sý tasqynynan 3,8 mıllıonnan astam adam zardap shekken. Ákimshilik úılerinen aıyrylǵandarǵa kómek kórsetetinin málimdedi.

Pendjabtyń tótenshe jaǵdaılar basqarmasynyń (PDMA) bas dırektory Arfan Alı Katııa myńdaǵan qutqarýshy kómek kórsetýge jumyldyrylǵanyn, al ásker adamdar men maldy qaýipsiz jerge kóshirýge tartylǵanyn aıtty. Onyń sózinshe, bul Pendjab tarıhyndaǵy eń aýyr sý tasqyny.

3 qyrkúıekte bılik sý basqan aýdandardan shamamen 300 myń adam evakýatsııalanǵanyn habarlaǵan edi.

Aıta ketsek, maýsymnan qyrkúıekke deıingi mýssondyq jańbyrlar jyl saıyn Ońtústik Azııada apatty jaǵdaılarǵa ákeledi. 26 maýsymnan beri Pákistan aýmaǵyndaǵy sý tasqynynan 800-den astam adam qaza tapsa, Úndistannyń Hımachal-Pradesh shtatynda maýsym basynan beri shamamen 300 adam qaza bolǵan.