Pákistannyń Pendjab provıntsııasynda sý tasqyny qaýpine baılanysty 25 myń adam evakýatsııalandy

ASTANA. KAZINFORM — Pákistannyń Pendjab provıntsııasynyń shyǵysynda keshe keshkisin bolǵan qatty jaýyn-shashyn men ózenderdegi sý deńgeıiniń kóterilýinen týyndaǵan sý tasqyny qaýpine baılanysty óńirden 25 myń adam evakýatsııalandy, dep habarlaıdy Anadoly. 

Pendjabtyń Tótenshe jaǵdaılar zardaptaryn joıý basqarmasynyń (PDMA) bas dırektory Irfan Alı Kathııa Djalalpýr-Pırvala qalasynda sý tasqyny qaýpine baılanysty halyqty kóshirý jumystary jalǵasyp jatqanyn habarlady.

Onyń aıtýynsha, keshe keshten beri joǵary qaýip aımaǵynda ornalasqan aýdandardan 25 myń adamdy evakýatsııalaý aıaqtalǵan.

Kathııa sondaı-aq provıntsııanyń 25 aýdanynda 4,1 mıllıonnan astam adam jáne 4 myńnan astam aýyldyń sý tasqynynan zardap shekkenin, al 26 tamyzdan beri tabıǵı apat saldarynan keminde 56 adamnyń qaza tapqanyn aıtty.

Pákistan tarıhynda alǵash ret Chenab, Ravı jáne Satledj ózenderi bir mezgilde arnasynan asyp, myńdaǵan aýyldy sý basty, mıllıondaǵan adam apattan zardap shekti.

4 qyrkúıekte Pendjab provıntsııasynyń resmı ókili Nabıl Djavadtyń málimdeýinshe, ózenderdegi sý deńgeıiniń kúrt kóterilýine jáne sý tasqynyna sebep bolǵan kúshti mýssondyq jańbyr saldarynan ótken aıdan beri 1,8 mıllıon adam qonys aýdarýǵa májbúr bolǵan.

Pákistannyń Tótenshe jaǵdaılar zardaptaryn joıý ulttyq basqarmasy buǵan deıin bıylǵy mýsson maýsymy 26 maýsymda bastalǵannan beri qaza tapqandar sany 910 adamǵa jetkenin málimdegen.

Bıliktiń aıtýynsha, bıylǵy sý tasqyny 2022 jylǵy apattan keıingi eń iri zilzalaǵa aınaldy. Ol kezde 1700-den astam adam qaza taýyp, el aýmaǵynyń úshten biri sý astynda qalǵan, al keltirilgen shyǵyn kólemi 32 mıllıard dollardy quraǵan edi. 

Buǵan deıin Pákistandaǵy sý tasqyny saldarynan 100-den astam adam iz-túzsiz ketkenin de jazǵanbyz.