Pákistannyń burynǵy premer-mınıstri men onyń jubaıy 17 jylǵa bas bostandyǵynan aıyryldy
ASTANA. KAZINFORM — Pákistannyń burynǵy premer-mınıstri, Pákistan ádilet partııasynyń (PTI) negizin qalaýshy Imran Han jáne onyń jubaıy Býshra Bıbı, qamaýda otyrǵanyna qaramastan, sybaılas jemqorlyq isi boıynsha 17 jylǵa túrmege sottaldy, dep habarlaıdy Anadoly.
Dawn gazetiniń jazýynsha, Imran Han men onyń jubaıy 2021 jyly resmı sapar kezinde Saýd Arabııasynyń taq murageri Muhammed bın Salman syıǵa tartqan zergerlik buıymdar jıyntyǵyn onyń naqty qunynan áldeqaıda tómen baǵamen satyp aldy degen aıyppen sottalǵan.
Sondaı-aq olarǵa shamamen 59 myń AQSh dollary (16,4 mıllıon pákistan rýpııasy) kóleminde aıyppul salyndy.
Pákistannyń aqparat mınıstri Attaýlla Tarardyń aıtýynsha, bul is boıynsha Imran Hanǵa taǵaıyndalǵan túrme jazasy 190 mıllıon fýnt sterlıngke qatysty sybaılas jemqorlyq isi boıynsha jaza merzimi aıaqtalǵannan keıin bastalady.
Atalǵandaı, Pákistan zańnamasyna sáıkes, premer-mınıstrler, mınıstrler, bıýrokrattar jáne joǵary laýazymdy memlekettik qyzmetkerler sheteldik memleket basshylarynan alǵan syılyqtary týraly «Toshahana» dep atalatyn arnaıy departamentke habarlaýǵa mindetti.
Keıinnen sheneýnikter bul syılyqtardy sol departamentten satyp ala alady.
Sot barysynda Imran Han quny shamamen 285 myń AQSh dollary (80 mıllıon rýpııa) bolatyn zergerlik buıymdar jıyntyǵyn nebári 10 myń AQSh dollaryna (2,9 mıllıon rýpııa) satyp alǵany aıtyldy.
Aldyńǵy sot otyrysynda Imran Han men Býshra Bıbı barlyq aıyptaýdy joqqa shyǵaryp, muny «Imran Handy saıasattan shettetýge baǵyttalǵan oıdan shyǵarylǵan ári saıası astary bar áreket» dep atady.
Imran Han 2022 jyldyń sáýir aıynda Ulttyq assambleıadaǵy senim votýmynan óte almaı, premer-mınıstr qyzmetinen shettetildi. Ony 2023 jylǵy 9 mamyrda Islamabad astanasynda qarýly kúshter tutqyndady. Onyń qamaýǵa alynýynan keıin el boıynsha jappaı narazylyq sherýi bastalyp, Hannyń jaqtastary Islamabad, Ravalpındı, Lahor, Karachı, Peshavar jáne basqa da kóptegen qalanyń kóshelerine shyqty. Sol kezde 9 adam qaza taýyp, 290-nan astam adam jaraqat aldy.
2023 jylǵy 12 mamyrda sot sheshimimen Han bosatyldy. Alaıda ol 2023 jylǵy 5 tamyzda sybaılas jemqorlyq isi boıynsha sottyń sanktsııasymen qaıtadan polıtsııa tarapynan qamaýǵa alynyp, túrmege jiberildi. Sodan beri ol qamaýda otyr.
Buǵan deıin bıylǵy jyldyń jeltoqsan aıynyń basynda Pákistan men Aýǵanstan shekarasynda jańa qarýly qaqtyǵystar bolǵany habarlanǵan edi.