Pákistandyqtar qazaqstandyq pııazdy kóbirek alatyn boldy
ASTANA. KAZINFORM – Búginde Qazaqstanda 130 myń tonnaǵa jýyq pııaz bolsa, onyń basym bóligi Jambyl oblysyna tıesili. Bul rette, QR Aýyl sharýashylyǵy mınıstrligi pııazdy Pákistan, Reseı jáne Baltyq jaǵalaýy elderine eksporttaý máselesin pysyqtaýda.
Bul týraly Ortalyq kommýnıkatsııalar qyzmetinde ótken dóńgelek ústel barysynda QR Aýyl sharýashylyǵy vıtse-mınıstri Erbol Tasjúrekov aıtty.
– Bul másele QR Saýda jáne ıntegratsııa mınıstrligimen birlesip pysyqtalyp jatyr. Pııazdy syrtqy naryqta satýdy qamtamasyz etý «QazTrade» Saýda saıasatyn damytý ortalyǵy» AQ-ǵa tapsyryldy. Búginde Pákistanǵa, Reseıge jáne Baltyq jaǵalaýy elderine pııaz jetkizý isi belsendi jalǵasýda, - dedi Erbol Tasjúrekov.
Aıta keteıik, buǵan deıin QR Aýyl sharýashylyǵy mınıstri Aıdarbek Saparov álemde pııaz baǵasy men eksport kólemi tómendep, Grýzııa men Ázerbaıjanǵa 160 myń tonna pııaz eksporttaý qajet ekenin aıtqan bolatyn.
