Pákistandyq stýdent WhatsApp-taǵy habarlamasy úshin ólim jazasyna kesildi
ASTANA. KAZINFORM – Pákistan soty WhatsApp habarlamalary arqyly Qudaıǵa til tıgizdi degen aıyppen 22 jastaǵy stýdentti ólim jazasyna kesti, dep habarlaıdy BBC.
Pendjab provıntsııasy sotynyń málimdeýinshe, aıyptalýshy fotosýretter men beınelerdi musylmandardyń dinı senimine nuqsan keltirý maqsatynda taratqan.
Dál osy is boıynsha 17 jastaǵy jasóspirim ómir boıyna bas bostandyǵynan aıyryldy. Aıyp taǵylǵan eki azamat kinásin moıyndaǵan joq.
Pákistanda Qudaıǵa til tıgizgender ólim jazasyna kesiledi. Keıbir kúdiktiler isteri sotqa deıin jetpeı jazalandy.
Shaǵymdy 2022 jyly Pákistannyń Federaldyq tergeý agenttiginiń (FIA) Pendjab provıntsııasynyń astanasy Lahor qalasyndaǵy kıberqylmys bólimi túsirdi.
Sot sheshiminde aıtylǵandaı, 22 jastaǵy jigit Muhammed paıǵambar men onyń áıelderine til tıgizetin fotolar men vıdeolar túsirgeni úshin ólim jazasyna kesildi.
Ekinshi aıyptalýshy materıal taratqany úshin ómir boıyna bas bostandyǵynan aıyryldy.
Shaǵymdanýshy oǵan úsh túrli uıaly telefon nómirinen beıne jáne fotosýretter túskenin aıtty.
FIA qyzmetkerleriniń málimdeýinshe, olar shaǵymdanýshynyń telefonyn tekserip, oǵan «ádepsiz materıal» jiberilgenin anyqtady.
Jastardyń advokattary olardyń «tuzaqqa túsip qalǵanyn» aıtty .
Ólim jazasyna kesilgen sottalýshynyń aty-jóni jarııalanbaǵan, ákesi VVS-ge Lahordyń Joǵarǵy sotyna shaǵymdanatynyn aıtty.
Qudaıǵa til tıgizýge qarsy zańdardy alǵash ret Úndistannyń brıtan bıleýshileri bekitip, 1980 jyldary Pákistannyń áskerı úkimeti tusynda keńeıtildi.
Ótken jyldyń tamyzynda eki hrıstıan Qurandy qorlady dep aıyptalǵannan keıin eldiń shyǵysyndaǵy Djaranvala qalasynda ondaǵan shirkeý men úı órtendi.
