Pákistandyq sáýletshi Izraıldiń joǵary marapatynan bas tartty

ASTANA. KAZINFORM - Pákistannyń tuńǵysh áıel sáýletshisi ıAsmın Ları Izraıldiń Gazaǵa baǵyttalǵan shabýyldaryna baılanysty Izraıldegi «Wolf» arhıtektýralyq syılyǵyn qabyldamady, dep habarlaıdy TRT.

Marapat úshin «sheksiz rızashylyǵyn» bildirgen ıAsmın Ları «Gazaǵa jasalyp jatqan genotsıdti» eskere otyryp, úkimetten táýelsiz uıym tabystaǵanymen de marapatty nemese aqshalaı syılyqty qabyldaı almaıtynyn málimdedi.

«Men úshin kez-kelgen zorlyq-zombylyqqa jol berýge bolmaıdy. Ómirimniń kóp bóligin, onyń ishinde klımattyq mıgranttardy qosa alǵanda, bosqyndardy qoldaýǵa arnadym. Ókinishke qaraı qazir Gaza halqy taǵdyry qıyn bosqynǵa aınaldy», - dedi ol.

Pákistandyq sáýletshi marapatty alýdan bas tartqannan keıin atalǵan syılyq qytaılyq sáýletshi Tıantıan Sıýıge buıyrdy. Sıýı «Qytaıdaǵy aýyldardy ekonomıkalyq, áleýmettik jáne mádenı turǵydan ózgertetin sáýlet jumystary» úshin marapattaldy.

«Wolf» syılyǵy - 1978 jyldan beri berilip kele jatqan halyqaralyq marapat. Resmı saıtynda «Wolf syılyǵy ǵylym men ónerdi adamzat ıgiligi úshin damytýǵa úles qosqan ǵalymdar men óner qaıratkerlerin qurmetteý úshin beriledi. Bul marapat arqyly biz álemdi jaqsartýǵa atsalysqan jańashyldar men kóshbasshylardy dáripteımiz» dep jazylǵan. Ár sanattaǵy marapatqa dıplom, qurmet medali jáne 100 000 dollar kiredi.

Aıta keteıik, Pákistandyq sáýletshi ıAsmın Ları uzaq jyldar boıy tabysy tómen qaýymdarǵa turaqty turǵyn úı men ekologııalyq peshter usyný úshin eńbek etip keledi. Ol 1941 jyly Pákistanda týǵan. 15 jasynda otbasymen birge Londonǵa qonys aýdarǵan. Oksford Brýks sáýlet mektebin bitirgennen keıin, 23 jasynda jubaıymen birge Pákistanǵa oralǵan. Ları balshyq, ák jáne bambýk sııaqty tabıǵı materıaldardy paıdalanyp, 50 000-nan astam ekologııalyq turaqty baspana jáne 80 000-nan astam ekologııalyq pesh saldy.

2007 jyly bambýkpen jumys isteı bastaǵan ol Haıber-Pahtýnhva provıntsııasynyń Svat aımaǵyndaǵy qaqtyǵystardan zardap shekkenderge arnalǵan qoǵamdyq asúıler saldy. Keıinirek eldi jaıpaǵan sý tasqyndarynan keıin sýdyń ústinde ornalasqan qoǵamdyq ortalyqtar turǵyzdy.

Onyń jumysy dástúrli gýmanıtarlyq kómekten táýeldilikti azaıtý arqyly jergilikti qaýymdastyqtardy kúsheıtýdi maqsat etetin «Barefoot Social Architecture» (Jalańaıaq áleýmettik sáýlet) dep atalatyn bilim almasý júıesine negizdelgen.

2023 jyly Ları gýmanıtarlyq qyzmetteri úshin Brıtandyq Koroldik Sáýletshiler Instıtýty (Royal Institute of British Architects) tarapynan Koroldik Altyn medalmen marapattaldy. 2020 jyly Ları «Jane Drew» syılyǵyn ıelendi.

Eske sala keteıik, buǵan deıin Izraıl túrmesinde 45 jyl otyrǵan palestınalyqtyń bostandyqqa shyǵatyny týraly jazǵan bolatynbyz.