Pákistandyq kásipkerlerge elimizde qolaıly jaǵdaı jasaýǵa daıynbyz — Memleket basshysy

ISLAMABAD. KAZINFORM — Prezıdent eki eldiń ónerkásip salasyndaǵy múmkindikteri mol ekenin aıtty. Budan bólek, eki el arasyndaǵy tikeleı áýe qatynasyn qaıta qosý múmkindigi zerdelenedi. Bul bıznesti, týrızmdi damytý turǵysynda óte ózekti, dep habarlaıdy Aqordanyń baspasóz qyzmeti.

Memleket basshysy agroónerkásip kesheninde ózara alys-beristi arttyrýǵa jáne birlesken óndiristerdi ashýǵa septigin tıgizetin mańyzdy kelisimder jasalǵanyn aıtty.

— Eki eldiń ónerkásip salasyndaǵy múmkindikteri mol. Men Pákistan kompanııalaryn elimizde taýarlar óndirýge baǵyttalǵan kásiporyndar ashýǵa shaqyrdym. Qazirgi ýaqytta olar aýyl sharýashylyǵy, farmatsevtıka jáne qurylys materıaldary ónimderin óndirýge qyzyǵýshylyq tanytýda, — dedi Qasym-Jomart Toqaev.

Prezıdent qorǵanys ónerkásibi aıasynda ózara tıimdi yntymaqtastyqtyń baǵyttaryn damytýǵa keliskenin aıtty.

— Keıingi jyldary qaýpsizdik organdary jáne quqyq qorqaý qurylymdary arasyndaǵy yqpaldastyq qarqyndy damýda. Kelissóz kezinde jasandy ıntellektini jáne tsıfrlyq tehnologııany ekonomıkaǵa jappaı engizýdiń strategııalyq mańyzy atap ótildi. Osy salada birlesip jumys isteýge daıyn ekenimizdi rastadyq. Pákistan ıslamdyq qarjylandyrý salasynda álemniń jetekshi elderiniń biri. Astana halyqaralyq qarjy ortalyǵynda eýrazııalyq keńistikte halal qarjyny damytý úshin barlyq jaǵdaı jasalǵan. Osy múmkindikterdi Pákistannyń qarjy ınstıtýttary da tıimdi paıdalana alady. Sonymen qatar ınvestıtsııalyq yntymaqtastyqqa nazar aýdardyq. Bul baǵytta búgin «Samuryq-Qazyna» qory jáne «Fauji Foundation» arasynda qurylǵan «Birlesken ınvestıtsııalyq platformasy» naqty jobalardy zerdeleıtin bolady. Jalpy, pákistandyq kásipkerlerge elimizde qolaıly jaǵdaı jasaýǵa daıynbyz, — dedi Toqaev.

Budan buryn Prezıdent Toqaev Qazaqstan men Pákistan taýar aınalymyn 1 mlrd dollarǵa jetkizýdi kózdeıtinin atap ótti.