Pákistandaǵy terrorızmge qarsy operatsııa kezinde 30 lańkestiń kózi joıyldy

ASTANA. KAZINFORM – Operatsııa kezinde 30 terrorısttiń kózi joıylǵany habarlandy, dep jazady Anadoly.

Pákistandyq áskerıler Belýdjıstan provıntsııasynda lańkesterge qarsy operatsııanyń aıaqtalǵanyn málimdedi.

Geo News habarlaýynsha, Pákistan armııasynyń qoǵammen baılanys bólimi (ISPR) jolaýshylar poıyzyna jasalǵan shabýylǵa qatysty málimdeme jasaǵan.

– Lańkesterdi zalalsyzdandyrý jáne jolaýshylardy bosatý operatsııasy aıaqtaldy, – delingen málimdemede.

Armııa poıyzǵa shabýyl jasaǵandardyń barlyǵy zalalsyzdandyrylǵanyn habarlady.

Belýdjıstandaǵy poıyzǵa shabýyl

12 naýryzda Pákistannyń ońtústik-batysyndaǵy Belýdjıstan provıntsııasynda shamamen 450 adam mingen poıyzǵa qarýly shabýyl uıymdastyryldy. Poıyz Kvettadan Peshavarǵa bet alǵan.

Shabýyldy Belýdjıstan azat etý armııasy uıymdastyrǵan. Sheneýnikterdiń aıtýynsha, sodyrlar kóptegen jolaýshylardy kepilge alǵan.

– Poıyz toqtaǵan aımaq taýly bolǵandyqtan, kúdiktilerge shabýyldy josparlaý ońaıǵa soqty, – deıdi sheneýnikter.

Qaýipsizdik qyzmetkerleri lańkester áıelder men balalardy tiri qalqan retinde paıdalanǵanyn rastady.

Pákistan armııasyndaǵy aqparat kózderi oqıǵany «terakt» dep atady.

Derekkózder jan-jaqty operatsııa júrgizilip, 30 terrorısttiń zalalsyzdandyrylǵanyn habarlady.

Aıta keteıik, buǵan deıin Pákistanda sodyrlar basyp alǵan poıyzdyń 150-den astam jolaýshysy qutqarylǵanyn jazǵan edik.