Pákistandaǵy tasqyn: 98 adam qaza taýyp, 185 adam jaraqat aldy

ISLAMBAD. KAZINFORM — 26 maýsymnan beri Pákistanda tolassyz jaýǵan mýsson jańbyrlary men kenetten bolǵan sý tasqyny saldarynan 98 adam qaza taýyp, taǵy 185 adam túrli jaraqat alǵan. Bul týraly Pákistannyń Tabıǵı apattardyń aldyn alý ulttyq basqarmasy (NDMA) juma kúni habarlady, dep jazdy Sınhýa.

Basqarmanyń málimetinshe, sońǵy táýlikte ǵana 8 adam qaza taýyp, 27 adam zardap shekken.

Eń kóp shyǵyn Pendjab provıntsııasynda tirkelgen — 37 adam qaza tapqan, olardyń 20-sy — balalar. Ekinshi orynda Haıber-Pahtýnhva provıntsııasy, onda 30 adam kóz jumǵan.

Bılik aldaǵy kúnderi jaýyn-shashyn bolýy múmkin ekenin eskertip, tómengi jáne qaýipti aımaqtarda turatyn halyqty saqtyq sharalaryn qabyldaýǵa shaqyrdy. Eń kóp zardap shekken óńirlerde qutqarý jumystary jalǵasyp jatyr.

Eske sala keteıik, buǵan deıin AQSh-tyń Tehas shtatyndaǵy kúshti sý tasqyny saldarynan, sońǵy málimetter boıynsha, 104 adam qaza tapty, onyń ishinde 28 bala bar. Apattan keıin 24 adam áli de habar-osharsyz ketkender qatarynda ekeni habarlandy.