Pákistanda saýda ortalyǵynda bolǵan órt saldarynan 6 adam qaza tapty

ASTANA. KAZINFORM — Pákistannyń Karachı qalasyndaǵy saýda ortalyǵynda shyqqan órt saldarynan alty adam qaza taýyp, órt sóndirýshiler otty áli de sóndirip jatyr. 30-ǵa jýyq adam tabylmaı jatyr, dep habarlaıdy VVS.

1200 dúken ornalasqan jáne 8000 sharshy metr aýmaqty qamtıtyn Gul Plaza saýda ortalyǵynyń bir bóligi qıraǵan, bul quqyq qorǵaý organdary qyzmetkerleriniń aıtýynsha, qutqarý jumystaryn qıyndatyp otyr.

Qaza tapqandar arasynda bir órt sóndirýshi bar, 20-dan astam adam jaraqat alǵan, al keıbir adamdar áli de kóp qabatty saýda ortalyǵynyń ishinde qalyp qoıdy degen kúdik bar.

Jergilikti tótenshe jaǵdaı qyzmetteri habarlaǵandaı, senbi kúni qutqarýshylar kelgende órt birinshi qabattan joǵary qabattarǵa taralyp, ǵımarattyń basym bóligi jalynǵa oranǵan.

Polıtseılerdiń joǵary laýazymdy ókili BBC-ge bergen suhbatynda, órt áli de jalǵasyp jatqandyqtan, ǵımarat ishinde denelerdi izdeý múmkin bolmaǵanyn aıtty.

Otbasy músheleriniń habarlamalary boıynsha, 30-dan astam adam habar-osharsyz joǵalǵan dep tirkelgen, al olardyń týystary qıraǵan ǵımarat qaldyqtarynyń janynda úmitpen kútip otyr. Qala ákimshiligi habar-osharsyz ketkenderdiń tizimin tirkeý pýnktin uıymdastyrdy.

Jeksenbi tańerteń Gul Plaza ǵımaratynan áli de tútin byqsyp turdy. Ǵımarattyń kóp bóligi qırap qalǵan, sondaı-aq túgeldeı qıraýy múmkin degen qaýip bar.

Karachı qalasyndaǵy 1122 qutqarý qyzmetiniń ókili Hasan Han BBC Urdu-ge habarlaǵandaı, saýda ortalyǵynda polıstırol, matalar, kilemder, parfıýmerııa sııaqty tez tutanatyn materıaldar saqtalǵan.

Aıta keteıik, keshe Mańǵystaýda órt sóndirý kóligi turǵyn úıge soǵylyp, eki adam qaza tapty. 

Al Jańa jyl merekesi túni Shveıtsarııadaǵy Kran-Montana elıtalyq kýrortynda 40 adam qaza taýyp, 100-den astamy kúıik jaraqatyn alǵan alapat órt boldy.