Pákistanda júk kóligi saıǵa qulap, 12 adam qaza tapty

ASTANA. KAZINFORM — Pákistannyń soltústik-batysyndaǵy Haıber-Pahtýnhva provıntsııasynda júk kóligi tereń saıǵa qulady. Jol apatynan 12 adam qaza taýyp, úsheýi jaralandy, dep habarlaıdy Belta.by.

Aldyn ala málimet boıynsha, Belýdjıstannyń ońtústik-batysyndaǵy Hanozaı aýdanynan Dera Ismaıl Han aýdanyna bet alǵan kóliktiń tejegishi isten shyǵyp, júrgizýshi burylysta tizginge ıe bola almaı, júk kóligi joldan shyǵyp, saıǵa qulaǵan.

Oqıǵa ornyna polıtsııa men qutqarý jasaǵy jetip, jolaýshylarǵa kómek kórsetti.

Agenttiktiń habarlaýynsha, qaza tapqandar arasynda 5 áıel men kem degende úsh bala bar. Jol apatynan zardap shekkender jaqyn mańdaǵy aýdandyq aýrýhanaǵa jetkizildi.

Polıtsııa oqıǵaǵa qatysty tergeýdi bastady.

Buǵan deıin Semeıde avtobýs pen manıpýlıator soqtyǵysqany týraly jazdyq.