Pákistanda jol apatynan 14 adam kóz jumdy

ASTANA. KAZINFORM — Pákistannyń shyǵysyndaǵy Pendjab provıntsııasynyń Djang aýdanynda avtobýs pen fýrgon soǵysyp, saldarynan 14 jolaýshy kóz jumdy. Taǵy 16 adam jaraqat aldy, dep habarlaıdy Sınhýa. 

Oqys jaǵdaı týraly jýrnalısterge okrýg komıssarynyń orynbasary Alı Akbar aıtyp berdi.

— Veterınarııa jáne janýarlar ǵylymdary ýnıversıtetiniń sportshylaryn Lahordaǵy jarysqa alyp bara jatqan avtobýs Djang aýdanynda fýrgonmen soqtyǵysty, — dedi ol. 

Alı Akbardyń aıtýynsha, jol apatyna eki kóliktiń de jyldamdyqty shamadan tys asyrýy sebep bolǵan.

— Toǵyz jolaýshy oqıǵa ornynda kóz jumdy, taǵy bes adam alǵan jaraqatynyń saldarynan aýrýhanada jan tapsyrdy, — dep qosty A. Akbar.

Osyǵan deıin Pákistannyń soltústik-batysyndaǵy Haıber-Pahtýnhva provıntsııasynyń Haıber aýdanynda qaýipsizdik kúshteriniń kóligi jarylyp, úsh qyzmetker qaza tapqan bolatyn.