Pákistanda jelim zaýytyndaǵy jarylystan 16 adam mert boldy

ASTANA. KAZINFORM — Pákistannyń Feısalabad qalasynda bolǵan jarylystan 16 adam qaza tapty, onyń altaýy bala, dep habarlaıdy ANEWZ.

Jarylystan aımaqtaǵy bir ǵımarat qulady. Sondaı-aq jaqyn mańdaǵy kóptegen qurylysqa aıtarlyqtaı zııan keldi. Jarylystyń saldarynan aımaqtyń ár bóliginde órt tutandy. 

Oqıǵa ornynda tótenshe jaǵdaılar qyzmeti órtti óshirip, qulaǵan ǵımarat úıindileriniń astynda qalǵan adamdardy qutqardy. 

Feısalabad komıssary Radja Djahangır Anvar jarylys zaýyttyń hımııalyq qoımasyndaǵy gazdyń shyǵýynan bolǵanyn habarlady. Zaýyt basshysy qamaýǵa alyndy.

Ázirge jarylystan qansha adam zardap shekkeni belgisiz.

Aıta keteıik, buǵan deıin Pákistan astanasy Islamabadta jarylys boldy. Onda 12 adam mert bolyp, ondaǵan adam jaraqat aldy.