Pákistanda jankeshtiniń shabýylynan 15 polıtseı qaza tapty
ASTANA. KAZINFORM - Pákistannyń Haıber-Pahtýnhva provıntsııasynda jankeshti uıymdastyrǵan shabýyl saldarynan keminde 15 polıtseı qaza tapty, dep habarlaıdy Anadoly.
Taǵy úsh adam jaralanǵan.
Dawn gazetiniń málimetinshe, jarylys Banný okrýgindegi Fateh Khel polıtsııa beketinde bolǵan.
Jankeshti jarylǵysh zat tıelgen kólikti blokbeket mańynda iske qosqan.
Shabýyl kezinde beket aýmaǵynda 18 qaýipsizdik qyzmetkeri bolǵan.
Jarylystan keıin qarýly top birneshe baǵyttan qýatty qarýdan polıtsııa beketine oq jaýdyrǵan.
Saldarynan blokbeket tolyq qıraǵan.
Jaqyn mańdaǵy brondalǵan tehnıka da jaramsyz kúıge túsken.
Sonymen qatar aınaladaǵy ǵımarattarǵa eleýli zaqym kelgen.
Oqıǵadan keıin aýdan aýrýhanalarynda tótenshe jaǵdaı rejımi engizildi.
Sońǵy jyldary Pákistanda terrorlyq shabýyldar jıilep ketken.
Ásirese Haıber-Pahtýnhva men Belýdjıstan provıntsııalarynda qarýly qaqtyǵystar jıi tirkeledi.
Bul aımaqtar Aýǵanstanmen shektesedi.
Pýshtýndar men belýdjdardyń quqyǵyn qorǵaımyz dep málimdeıtin qarýly toptar Pákistannyń qaýipsizdik kúshteri men beıbit turǵyndarǵa shabýyl jasap keledi.
Islamabad pákistandyq talıbter Tehrık-e Talıban Pákistan qozǵalysynyń músheleri Aýǵanstan aýmaǵynda ornalasqan dep esepteıdi.
Alaıda Aýǵanstan bıligi bul aıyptaýlardy joqqa shyǵaryp otyr.
Al Belýdjıstanda eń belsendi toptardyń biri — Belýdjıstandy azat etý armııasy.
Bul uıym provıntsııany Pákistan quramynan bólip shyǵýdy jáne belýdj halqyna ózin-ózi basqarý quqyǵyn berýdi talap etedi.
Osyǵan deıin Pákistanda qarýly shabýyl saldarynan 7 adam mert bolǵany týraly jazdyq.
