Pákistanda jankeshti uıymdastyrǵan jarylystan 50 adam qaza tapty

Pákistanda jankeshti lańkestiń shabýylynan 50 adam mert bolyp, ondaǵan turǵyn zardap shekti. QazAqparat bul týraly BBC News basylymyna silteme jasap habarlaıdy.

Jarylys juma kúni ońtústik-batystaǵy Belýdjıstan provıntsııasyndaǵy meshit mańynda, adamdar Muhammed paıǵambardyń týǵan kúnin toılaýǵa shyqqan kezde bolǵan.

Belýdjıstan bıligi tótenshe jaǵdaı jarııalady. Eshbir top shabýyldy óz moınyna alǵan joq.
Sol aralyqta Haıber-Pahtýnhva provıntsııasyndaǵy Peshavar qalasyna jaqyn jerdegi meshitte taǵy bir jarylys boldy.

Peshavarǵa jaqyn mańdaǵy Hangý meshitinde bolǵan jarylystan qurban bolǵandar sany ázirge belgisiz. Biraq polıtsııanyń habarlaýynsha, birneshe adam shatyr qulaǵannan keıin úıindi astynda qalǵan bolýy múmkin.

Mastýng qalasyndaǵy oqıǵa ornynan túsirilgen kadrlardan qutqarýshylar men jergilikti turǵyndardyń jaralanǵan adamdardy qalaı qutqaryp jatqanyn kórýge bolady.

Belýdjıstan polıtsııasynyń basshysy Abdýl Halık Sheıh jarylys jankeshti lańkestiń shabýyly saldarynan bolǵanyn rastady. Ol shabýyldaýshyny toqtatpaq bolǵan kezde polıtsııa aǵa ofıtseri mert bolǵanyn málimdedi.

Aýǵanstan jáne Iranmen shektesetin Belýdjıstan Pákistannyń iri provıntsııasy sanalady. Sonymen qatar qalaǵa «Tehrık-ı Talıban Pákistan» (TTP) nemese pákistandyq Talıban, sondaı-aq «Islam memleketi» toptary syndy qarýly sarbazdar jıi shabýyl jasaıdy.

Degenmen TTP jumadaǵy jarylysqa qatysy joq ekenin málimdep, mundaı shabýyl olardyń saıasatyna qaıshy ekenin aıtty.

Buǵan deıin osy aıda sol aýdanda bolǵan jarylystan on bir adam, onyń ishinde tanymal musylman kóshbasshysy jaraqat alǵan bolatyn.

Shildede Haıber-Pahtýnhva provıntsııasynyń soltústik-batysynda dinı saıası partııanyń jınalysynda jankeshti lańkes jarylys uıymdastyryp, 40-tan astam adam mert boldy.