Pákistanda jankeshti mektep avtobýsyn jaryp jiberdi

ASTANA. KAZINFORM —21 mamyr, sársenbi kúni tańerteń Pákistannyń ońtústik-batysynda jankeshti mektep avtobýsyna shabýyl jasady, dep habarlaıdy Apnews.com. 

Jarylys saldarynan kem degende tórt bala qaza taýyp, taǵy 38-i jaraqat aldy. Birneshe balanyń jaǵdaıy aýyr.

Jergilikti bıliktiń málimetinshe, shabýyl Hýzdar aýdanynda bolǵan. Avtobýs mektep oqýshylaryn áskerı akademııaǵa alyp bara jatqan. Lańkes ishinde balalary bar kóliktiń janynda ózin jaryp jibergen.

Ázirge lańkestik toptardyń eshqaısysy oqıǵa úshin jaýapkershilikti óz moınyna alǵan joq.

Pákistannyń Іshki ister mınıstri Mohsın Nakvı shabýyldy qatań aıyptady. Ol qylmyskerdi «haıýan» dep atap, balalarǵa shabýyl jasaý – aqtaýǵa bolmaıtyn naǵyz qatigezdik ekenin basa aıtty.

Eske sala keteıik, Pákistanda aptap ystyq jahandyq rekordqa jaqyndady.