Pákistanda sý tasqynynan taǵy 30-dan astam adam qaza tapty

ASTANA. KAZINFORM – Pákistanda sońǵy aptada bolǵan sý tasqyny saldarynan 33 adam qaza taýyp, 8 adam jaraqat aldy. Bul týraly Dawn gazeti Pendjab provıntsııasynyń tótenshe jaǵdaılar basqarmasyna (PDMA) silteme jasap habarlady.

Málimetke sáıkes, 23-31 tamyz aralyǵynda tabıǵı apattan shamamen 2 mıllıon adam zardap shekken. Qutqarýshylar 760 myń adamdy jáne 516 myńnan astam maldy qaýipsiz aımaqqa evakýatsııalady. Zardap shekkender úshin 506 gýmanıtarlyq lager uıymdastyryldy.

Ulttyq tótenshe jaǵdaılar basqarmasy (NDMA) buǵan deıin 23 adamnyń qaza bolǵanyn habarlaǵan edi.

Sondaı-aq vedomstvo 1-3 qyrkúıek aralyǵynda Islamabad pen Pendjabtyń birneshe aýdanynda nóser jaýyn kútiletinin, bul jaǵdaı jańa sý tasqynyna ákelýi múmkin ekenin eskertti.

Pendjabtyń aǵa mınıstri Marıam Aýrangzeb oqıǵany «Pendjab tarıhyndaǵy eń iri sý tasqyny» dep atap, sý deńgeıiniń rekordtyq kórsetkishke jetkenin aıtty.

Aıta ketsek, 26 maýsymnan beri Pákistanda bolǵan sý tasqyndarynan 800-den astam adam kóz jumdy.

Al Úndistannyń Hımachal-Pradesh shtatynda maýsym aıynan beri shamamen 300 adamnyń qazasy tirkelgen.

Buǵan deıin Pákistandaǵy sý tasqyny saldarynan 100-den astam adam iz-túzsiz ketkenin de jazǵanbyz.