Pákistanda sý tasqyny qaýpine baılanysty shamamen 110 myń adam evakýatsııalandy
ASTANA. KAZINFORM — Tamyz aıynan beri Pendjabta 1,8 mıllıon adam úılerin tastap ketýge májbúr boldy, dep jazdy Anadoly agenttigi.
Pákistannyń Sındh provıntsııasynda Úndistan bógetterden sý jibergennen keıin týyndaǵan sý tasqyny qaýpine baılanysty shamamen 110 myń adam qaýipsiz aımaqtarǵa evakýatsııalandy.
Provıntsııa bıliginiń málimdemesinde Ind ózeniniń mańyndaǵy tómengi jazyqtarda turatyn turǵyndardy kóshirý qarqyn alǵany aıtylǵan.
— Ind ózenindegi sý deńgeıiniń kóterilýine baılanysty sý tasqyny qaýpi bar aımaqtardan shamamen 110 myń adam evakýatsııalandy. Qaýipti aımaqtardan halyqty kóshirý jalǵasýda, — delingen habarlamada.
Pákistannyń Tótenshe jaǵdaılar jónindegi ulttyq agenttiginiń (NDMA) derekterine sáıkes, tek tamyz aıynda Pendjab provıntsııasynda 1,8 mıllıon adam óz úılerin tastap ketýge májbúr bolǵan. Ózenderdiń tasýy saldarynan 3900-ge jýyq aýyl sý astynda qalǵan.
Úndistan sý tasqyny shekaradan ótýi múmkin ekenin Pákistanǵa dıplomatııalyq arnalar arqyly aldyn ala habarlaǵan. Úndistan syrtqy ister mınıstrliginiń ókili Randhır Djaısval sý tasqyny týraly málimetterdiń Islamabadqa jetkizilgenin aıtty.
Ońtústik Azııada maýsymnan qyrkúıekke deıin bolatyn mýsson jańbyrlary jyl saıyn Úndistan men Pákistandy qosa alǵanda, óńir elderinde iri tabıǵı apattar men tótenshe jaǵdaılarǵa sebep bolady.
2025 jyldyń 26 maýsymynan beri Pákistan aýmaǵynda bolǵan sý tasqyndarynan 800-den astam adam qaza tapty, al Úndistannyń Hımachal-Pradesh shtatynda maýsym aıynan beri shamamen 300 adam kóz jumdy.
Al keshe Pákistannyń Pendjab provıntsııasyndaǵy sý tasqynynana baılanysty taǵy jarty mln adam evakýatsııalanǵan bolatyn.