Pákistanda sot jeti adamǵa aıryqsha qatań jaza taǵaıyndady
ASTANA. KAZINFORM — Pákistanda qatarynda bireshe jýrnalıst, kommentator, ınflıýenser, sarapshy jáne burynǵy áskerı qyzmetkeri bar jeti adamǵa ómir boıyna bas bostandyǵynan aıyrý jáne odan bólek te úsh bap boıynsha taǵy 10, 10 jáne 5 jyldan bas bostandyǵynan aıyrý jazasy taǵaıyndaldy. Bul týraly Dawn basylymy jazdy.
Islamabadtaǵy terrorızmge qarsy sot olardy 2023 jylǵy 9 mamyrda eks-premer-mınıstr Imran Hannyń tutqyndalýynan keıin bolǵan tártipsizdikter kezinde halyqty zorlyq-zombylyqqa arandatty jáne búlikshilerdi qoldady dep tanydy.
Sot sheshimi 2 qańtar kúni sýdıa Tahır Abbas Sıpranyń tóraǵalyǵymen syrttaı ótken sot otyrysynyń nátıjesinde shyǵaryldy. Sottalǵandar qatarynda ıýtýber Adıl Radja, jýrnalıster Vajahat Saıd Han, Sabır Shakır, Shahın Sehbaı, telejúrgizýshi Haıder Raza Mehdı, sarapshy Moed Pırzada jáne burynǵy áskerı qyzmetker Akbar Hýseın bar.
Aıyptaý tarapynyń málimdeýinshe, olar ınternet platformalardy paıdalana otyryp, memleketke qarsy shabýyldardy qozdyrǵan, jeńildetken jáne kúsheıtken, bul «memlekettik ınstıtýttarǵa qarsy tsıfrlyq terrorızm» retinde baǵalanǵan. Tártipsizdikter kezinde memlekettik jáne áskerı nysandar da búlingen.
Sot eki negizgi aıyp boıynsha — Pákistanǵa qarsy soǵys ashý nemese oǵan járdemdesý jáne qylmystyq sóz baılasqany úshin kúdiktilerge ómir boıǵy túrme jazasyn taǵaıyndady. Sonymen qatar olardyń árqaısysyna eki qylmys boıynsha 500 000 rýpıı kóleminde aıyppul tóleý mindetteldi.
Budan bólek, Pákistan Qylmystyq kodeksiniń 121-A-baby boıynsha (Pákistanǵa qarsy soǵys júrgizý nemese soǵan áreket jasaý qylmysyna qatysty sóz baılasý) 10 jylǵa qatań rejımdegi túrme jazasy jáne 200 000 rýpıı aıyppul taǵaıyndaldy.
Sondaı-aq olar Pákistan Qylmystyq kodeksiniń 131-baby boıynsha (búlikke arandatý nemese sarbazdy, teńizshi men áýe kúshteri qyzmetkerin qyzmettik mindetin oryndamaýǵa úgitteý) qosymsha 10 jylǵa bas bostandyǵynan aıyrý jáne 200 000 rýpıı aıyppul jazasyna kesildi.
Buǵan qosa, 1997 jylǵy Terrorızmge qarsy kúres týraly zań aıasynda úsh bap boıynsha árqaısysy 5 jyldan úsh qosymsha jaza taǵaıyndaldy. Sonymen birge osy úsh qylmystyń árqaısysy úshin 200 000 rýpııden aıyppul salyndy.
Sot qaýlysyna sáıkes, eger olar ózderine taǵylǵan kez kelgen qylmys boıynsha aıyppuldy tólemegen jaǵdaıda bas bostandyǵynan aıyrý merzimi árbir quqyq buzýshylyq úshin alty aıǵa uzartylady.
Barlyq jazalar qatar óteledi. Sottalǵandarǵa jeti kún ishinde Islamabad joǵary sotyna shaǵym túsirý quqyǵy berildi. Elge oralǵan jaǵdaıda olardy qamaýǵa alýǵa ruqsat etilgen.
Amnesty International jáne «Shekarasyz tilshiler» uıymdary bul isti burynnan synǵa alyp, Pákistanda oppozıtsııalyq jáne synshyl pikirlerdi basý úshin terrorızm men búlik týraly zańdardyń qoldanylyp jatqanyn atap ótken.
Eske sala ketsek, Pákistanda burynǵy premer-mınıstr Imran Han ustalǵannan keıin halyq narazylyqqa shyqqanyn jazǵanbyz.
Al Imran Han fenomeni Pákistan men óńir ómirine qalaı yqpal etýi múmkin ekenin myna siltemeden oqı alasyz.