Pákistanda sodyrlar basyp alǵan poıyzdyń 150-den astam jolaýshysy qutqaryldy
ASTANA. KAZINFORM – «Belýdjıstan azat etý armııasynyń (BLA) ekstremıstik tobynyń sodyrlary seısenbi kúni Kvettadan Peshavarǵa bara jatqan Jaffar Express poıyzyn basyp alǵany úshin jaýapkershilikti óz moınyna aldy.
Sodyrlar 200-ge jýyq adamdy kepilde ustap otyrǵanyn alǵa tartyp otyr, dep habarlaıdy India Today.
Sársenbi kúni tańerteńgi jaǵdaı boıynsha qaýipsizdik kúshteri júrgizip jatqan operatsııa barysynda keminde 155 jolaýshy qutqarylyp, 27 sodyr óltirildi.
Belýdjıstan provıntsııasynyń táýelsizdigine umtylǵan BLA qazirgi ýaqytta 214 adamdy kepilde ustap otyrǵanyn jáne kem degende 30 qaýipsizdik qyzmetkerin óltirgenin jarııalady. Pákistan bıligi bul málimetti áli rastaǵan joq.
Ekstremıstik top 48 saǵat ishinde áskerıler urlap ketti dep shamalanǵan saıası tutqyndardy, belsendilerdi jáne iz-túzsiz joǵalǵan adamdardy bosatýdy talap etti. Sodyrlar talaptary belgilengen merzimde oryndalmaǵan jaǵdaıda kepilge alynǵandardy, sonyń ishinde áskerı qyzmetkerlerdi óltiremiz jáne poıyzdy «tolyǵymen qıratamyz» dep qorqytty.
Qaýipsizdik qyzmetindegi derekkóz Reuters agenttigine Jaffar Express bortyndaǵy 425 jolaýshynyń 80-i áskerı qyzmetker ekenin habarlady. Taǵy bir derekkóz qutqarylǵan 104 jolaýshynyń 17-si jaraqat alǵanyna baılanysty emdeý úshin aýrýhanaǵa jetkizilgenin qosyp ótti.
Qaýipsizdik kúshteri tutqyndardy qutqarý operatsııasyn jalǵastyryp jatyr.
Eske salaıyq, seısenbi kúni sodyrlar Gýdalar men Pırý Kýnrı taýly aımaǵynyń mańyndaǵy Mashkaf týnnelinen ótip bara jatqanda toǵyz vagonda 425 jolaýshy mingen Jaffar Express poıyzyna oq jaýdyrǵan. Poıyzdy basyp almas buryn kóterilisshiler joldardy jaryp jiberip, ony shalǵaı aımaqta toqtaýǵa májbúrlegen.
Eske sala ketsek, Pákistanda sodyrlar poıyzdyń 450 jolaýshysyn kepilge alǵanyn jazǵan bolatynbyz.
Geo TV arnasynyń habarlaýynsha, ekstremıster temir joldy jaryp jiberip, keıin poıyzǵa oq jaýdyrǵan. Poıyz júrgizýshisi zardap shekti. Shabýyl kezinde poıyz kúzetshileri men sodyrlar arasynda atys boldy.