Shakıra fýtboldan 2026 jylǵy álem chempıonatynyń resmı ánin tanystyrdy
ASTANA. KAZINFORM – Kolýmbııalyq ánshi Shakıra 2026 jylǵy fýtboldan álem chempıonatynyń resmı ánin usyndy. Bul týraly Reuters agenttigi habarlady.
«Dai Dai» dep atalatyn kompozıtsııa nıgerııalyq oryndaýshy Burna Boymen birlesip jazylǵan. Ánniń resmı tusaýkeseri 14 mamyrǵa josparlanǵan.
Shakıra buǵan deıin de álem chempıonattarynyń mýzykalyq baǵdarlamalaryna birneshe ret qatysqan. 2010 jyly ol oryndaǵan Waka Waka (This Time for Africa) álem chempıonattary tarıhyndaǵy eń tanymal ánderdiń birine aınalǵan edi.
Sonymen qatar ánshi 2006 jáne 2014 jylǵy týrnırler aıasynda Hips Don’t Lie jáne La La La (Brazil 2014) ánderin oryndap, fýtbol álemindegi eń tanymal mýzykalyq tulǵalardyń biri boldy.
Jańa ánniń anonsyn Shakıra áleýmettik jelidegi paraqshasynda jarııalap, Brazılııadaǵy Marakana stadıonynan túsirilgen beınerolıkpen bólisti.
Vıdeoda ánshi ártúrli ulttyq quramalardyń formasyn kıgen bıshilermen birge kórinedi. Sondaı-aq rolıkte ár jyldardaǵy álem chempıonattarynyń resmı doptary kórsetilgen.
Eske salaıyq, 2026 jylǵy fýtboldan álem chempıonaty 11 maýsym men 19 shilde aralyǵynda AQSh, Kanada jáne Meksıka aýmaǵynda ótedi. Týrnır tarıhynda alǵash ret oǵan 48 qurama qatysady.
Aıta keteıik, buǵan deıin FIFA 2026 jylǵy álem chempıonaty fınalyna rekordtyq bılet baǵasyn bekitken bolatyn. Eń qymbat bılet quny 10 990 dollarǵa jetken.
