Pákistanda ótken jarysta Qazaqstan áskerı qyzmetshileri jeńimpaz atandy
ASTANA. KAZINFORM – QR Qarýly kúshteri Qurlyq áskerleriniń áskerı qyzmetshileri «Pákistan armııasynyń komandalyq rýhy-2024» halyqaralyq jarysynda top jardy, dep habarlaıdy Qorǵanys mınıstrliginiń baspasóz qyzmeti.
Jarys Pákistannyń astanasy Islamabad mańyndaǵy ejelgi Ravalpındı qalasynda ótti. Áskerı-sporttyq týrnır «qarsylastyń nysandaryn anyqtaý», «tosqaýyldaǵy is-qımyl», «artıllerııa atysyn retteý», «jedel medıtsınalyq kómek kórsetý jáne jaralylardy evakýatsııalaý», «ýchaskeni mınadan tazartý», «túnde sý bógetterin eńserý» jáne Kalashnıkov avtomatynan atý kezeńderinen turdy.
Jarystyń kúrdeliligi tapsyrmalar shartty qarsylas basyp alǵan taýly jerlerde oryndalýynda edi. Myqty dene shynyqtyrý jattyǵýlary, is-qımyl úılesimdiligi, shydamdylyq pen komandalyq rýh qazaqstandyq jaýyngerlerdiń sátti óner kórsetýiniń kepili boldy.
– Bizdiń psıhologııalyq daıyndyǵymyz ben qanshalyqty shymyr ekenimizdi urysqa barynsha jaqyndatylǵan jaǵdaıda kúrdeli, ári beıtanys jerde synap kórýge tamasha múmkindik týdy. Eń bastysy – jaqsy tájirıbe aldyq, – dep qorytyndylady komandanyń jetekshisi podpolkovnık Erbol Serǵazın.
«Pákistan armııasynyń komandalyq rýhy-2024» halyqaralyq jarysy 2016 jyldan bastap turaqty túrde ótkizilip keledi. Bıyl qazaqstandyq áskerı qyzmetshiler úshinshi ret qatysyp otyr. 2021 jyly áskerı baqylaýshylar retinde barsa, 2023 jyldan bastap tolyqqandy qatysýshylar bolyp keledi.
Esterińizge sala keteıik, bul jarystarǵa Bahreın, Iordanııa, Irak, Qazaqstan, Katar, Saýd Arabııasy Koroldigi, Maldıv, Marokko, Pákistan, AQSh, Taıland, Túrkııa, Ózbekstan jáne Shrı-Lanka áskerı qyzmetshileri qatysty.
