Pákistanda oqý ortalyǵynyń shatyry opyrylyp, 14 bala qaza tapty
ASTANA. KAZINFORM – Pákistannyń Lahor qalasynda oqý ortalyǵynyń shatyry opyrylyp, keminde 14 bala qaza taýyp, birnesheýi jaraqat aldy, dep habarlaıdy Sınhýa.
Rescue 1122 qutqarý qyzmetiniń resmı ókili Farýk Ahmedtiń aıtýynsha, oqıǵa eldiń shyǵysyndaǵy Pendjab provıntsııasyna qarasty Lahor qalasynyń mańyndaǵy Kahna aýdanynda bolǵan. Oqıǵa kezinde ondaǵan bala sabaqta otyrǵan. Osy sátte synyptyń shatyry kenetten opyrylyp, oqýshylar úıindi astynda qalǵan.
Farýk Ahmedtiń málimetinshe, apat saldarynan 14 bala qaza taýyp, taǵy on shaqty zardap shekkenniń jaǵdaıy aýyr. Osyǵan baılanysty qurbandar sany artýy múmkin.
Qazirgi ýaqytta qutqarýshylar úıindi astynda qalǵan adamdardy izdeý jáne qutqarý jumystaryn jalǵastyryp jatyr.
Aıta keteıik, Fılıppındegi mektepte atys bolyp, úsh oqýshy qaza tapty.
Sondaı-aq byltyr Pákistanda jelim zaýytyndaǵy jarylystan 16 adam mert bolǵan edi.
