Pákistanda kúrish pen maqtanyń jartysyna jýyǵy sý astynda qaldy

ASTANA. KAZINFORM — Pákistandaǵy sońǵy onjyldyqtaǵy eń kúshti sý tasqyny aýyldyq aımaqtarmen birge ónerkásiptik ortalyqtarǵa da zardabyn tıgizip, mıllıardtaǵan dollar shyǵyn keltirdi jáne azyq-túlik pen eksport jetkizilimine aýyr salmaq túsirdi, dep habarlaıdy AZERTADJ.

Úkimet 2026 jylǵa úlken úmitpen qarap, aýyl sharýashylyǵy men óńdeýshi ónerkásiptiń qalpyna kelýi aıasynda, sondaı-aq Halyqaralyq valıýta qorynan bólingen 7 mlrd dollarlyq kómektiń arqasynda ekonomıkanyń turaqtanýynan keıin JІÓ ósimi 4,2% deńgeıinde bolady dep boljaǵan edi.

Alaıda maýsym aıynyń sońynan beri jaýǵan rekordtyq mýssondyq jańbyr, sonymen qatar Úndistandaǵy bógetterden jiberilgen sýdyń kúsheıýi Pendjab pen Sındtiń — halqy eń tyǵyz ornalasqan ári ekonomıkalyq mańyzy zor eki provıntsııasynyń aýqymdy aýmaqtaryn sý astynda qaldyrdy, dep jazady Reuters.

Kóptegen aımaqta sý áli qaıtpaǵanyna qaramastan, bılik pen sarapshylar saldary 2022 jylǵy apattan da aýyr bolýy múmkin ekenin eskertip otyr. Ol kezde eldiń úshten biri sý astynda qalǵan bolatyn. Bul joly aýyl sharýashylyǵy men óndiristiń qos soqqysy aýyr tıip otyr.

Jazyqtardaǵy spýtnıktik sýretter sý tasqyny aýqymyn aıqyn kórsetedi. GEOGLAM aýyl sharýashylyǵyn baqylaý uıymynyń esebine sáıkes, 1 tamyz ben 16 qyrkúıek aralyǵynda keminde 220 myń gektar kúrish egistigi sý astynda qalǵan. Kúrish, maqta jáne júgeri ósiriletin negizgi óńir — Pendjabta 1,8 mln akr aýyl sharýashylyǵy jeri sýǵa ketken.

— Kúrish egininiń shamamen 50%-y, al maqta men júgeriniń 60%-y zardap shekti, — dedi Pákistan fermerler qaýymdastyǵynyń tóraǵasy Halıd Bat.

Baǵalaý boıynsha, elde eginniń keminde onnan biri joıylǵan, al keıbir aımaqtarda kókónis shyǵyny 90%-ǵa deıin jetken.

Pákistannyń josparlaý mınıstri Ahsan Ikbal sý tasqyny JІÓ ósimin «tejeıtinin» moıyndap, naqty shyǵyn týraly málimetter shamamen eki aptadan keıin daıyn bolatynyn aıtty. 

Aıta ketelik Pákistandaǵy sý tasqynynan qaza tapqandar sany 1000 adamnan asty.