Pákistanda qarýly adamdardyń shabýylynan keminde 38 adam qaza tapty

ISLAMABAD. KAZINFORM – Búgin, 26 tamyzda Pákistannyń ońtústik-batysynda qarýly adamdar eki ret shabýyl jasap, keminde 38 adam kóz jumdy. Qaýipsizdik kúshteri 12 shabýylshynyń da kózin joıǵan. Bul týraly «Associated Press» habarlady. 

Polıtsııa ofıtseri Aıýb Achakzaıdyń aıtýynsha, Belýdjıstannyń Mýsahaıl aýdanynda avtobýstardan, kólikterden jáne júk kólikterinen urlap áketken 23 adam oqqa ushqan. Shabýylshylar qashyp ketpes buryn keminde 10 kólikti órtep jibergen. 

Sondaı-aq, sol provıntsııanyń Kalat aýdanynda qarýly adamdar kem degende toǵyz adamdy, onyń ishinde tórt polıtseı men bes beıbit turǵyndy óltirdi.

Kóterilisshiler Bolandaǵy temir joldy jaryp jiberdi, Mastýng qalasyndaǵy polıtsııa bólimshesine shabýyl jasady jáne Gvadarda, Belýdjıstannyń barlyq aýdandarynda kólikterdi órtegen.

Shabýyldy «Belýjıstandy azat etý armııasynyń» radıkaldary uıymdastyrǵany atap ótildi.

Aıta keteıik, Belýdjıstan Pákistannyń kópten beri jalǵasyp kele jatqan qaqtyǵystardyń ortasy bolýda, birneshe separatıstik toptar negizinen qaýipsizdik kúshterine qarsy shabýyldar jasaýda. Kóterilisshiler Islamabadtaǵy ortalyq úkimetten táýelsizdik talap etip keledi.