Pákistanda bolǵan teraktiden keminde 12 polıtseı qaza tapty
ASTANA. KAZINFORM — Pákistannyń soltústik-batysyndaǵy Haıber-Pahtýnhva provıntsııasynda jankeshti jarylǵysh zat tıelgen kólikpen polıtsııa bólimshesine soqtyǵysyp, saldarynan keminde 12 polıtseı qaza taýyp, birneshe adam jaraqat aldy, dep jazady Sınhýa.
Oqıǵa senbi kúni jergilikti ýaqyt boıynsha saǵat 20:55-te Banný okrýginde bolǵan. Derekkózderdiń Sınhýa agenttigine málimet berýinshe, polıtsııa bólimshesi tolyǵymen qıraǵan.
Qazirgi ýaqytta qutqarý toptary aýyr tehnıka kómegimen úıindilerdi tazartý jumystaryn jalǵastyryp jatyr. Bılik ókilderi qırandylar astynda áli de qaza tapqandar bolýy múmkin dep qaýiptenedi.
Saperlerdiń baǵalaýynsha, shabýyl kezinde 1200-1500 kelige deıin jarylǵysh zat qoldanylǵan.
Jarylys úshin jaýapkershilikti «Ittıhad-ýl-Mýdjahıdın Pákistan» (IMP) atty qarýly top óz moınyna aldy.
Sońǵy aılarda Aýǵanstanmen shekaralas Pákistannyń soltústik-batys aımaqtarynda qaýipsizdik kúshteri men quqyq qorǵaý organdaryna baǵyttalǵan qarýly shabýyldar jıilegen.
Buǵan deıin AQSh prezıdenti Donald Tramp Iranmen kelissózder júrgizý úshin Pákistanǵa josparlanǵan amerıkalyq delegatsııanyń saparyn toqtatqanyn jazǵan edik.
