Pákistanda avtobýs shatqalǵa qulap, 40 adam qaza tapty
ASTANA. KAZINFORM — Pákistannyń Belýdjıstan jáne Haıber-Pahtýnhva provıntsııalarynyń shekarasynda jolaýshylar avtobýsy shatqalǵa qulap, keminde 40 adam qaza tapty, taǵy segizi jaraqat aldy. Bul týraly Kazinform agenttiginiń tilshisi DAWN basylymyna silteme jasap habarlaıdy.
Jol apaty juma kúni tańerteń bolǵan.
Rescue 1122 qutqarý qyzmetiniń málimetinshe, avtobýsta 48 adam bolǵan. Zardap shekkender Job qalasynyń aýdandyq aýrýhanasyna jetkizildi. Qaza bolǵandardyń máıitteri de osy medıtsınalyq mekemege jetkizilgen.
Job qalasyndaǵy jedel áreket etý ortalyǵynyń basshysy Sanaýlla Sheranıdiń aıtýynsha, avtobýs shamamen 21–24 metr bıiktikten shatqalǵa qulaǵan. Taýly ári jetýi qıyn jer bederi qutqarý jumystaryn edáýir qıyndatqan.
Jergilikti bıliktiń málimetinshe, avtobýs Kvetta qalasynan 36 jolaýshymen shyqqan. Alaıda jolda buzylyp qalǵan basqa avtobýstyń jolaýshylaryn da mingizgen. Sonyń saldarynan kólik shamadan tys júktelgen.
Belýdjıstan provıntsııasynyń bas mınıstri Sarfraz Býgtı jol apatynyń sebepterin anyqtaý úshin tergeý júrgizýdi tapsyrdy.
Pákistannyń Premer-mınıstri Shehbaz Sharıf pen el prezıdenti Asıf Álı Zardarı qaza tapqandardyń týǵan-týystary men jaqyndaryna kóńil aıtty. Memleket basshysy sondaı-aq zardap shekkenderdiń barlyǵyna qajetti medıtsınalyq kómek kórsetýdi tapsyrdy.
Buǵan deıin Pákistanda jankeshtiniń polıtsııa beketine jasaǵan shabýyly saldarynan 15 polıtsııa qyzmetkeri qaza taýyp, taǵy úsh adam jaralanǵany habarlanǵan bolatyn.
