Pákistanda ár búırekti $120 myńnan satyp kelgen qylmystyq top ustaldy

Pákistanda aýqatty klıentterge transplantatsııalaý úshin zańsyz jolmen búırek satqan segiz adamnan turatyn qylmystyq top qamaýǵa alyndy. Olardyń quramynda medıtsına qyzmetkeri de bolǵan. Jergilikti bıliktiń habarlaýynsha, keıbir donorlarǵa kelisiminsiz ota jasalǵan, dep habarlaıdy QazAqparat BBC jańalyqtaryna silteme jasap.

Pákistannyń Pendjab provıntsııasy úkimetiniń basshysy Mohsın Nakvı jeksenbi kúngi baspasóz máslıhatynda dáriger Favad Mýhtar búırekti alý operatsııasyn úıde, tipti kóp jaǵdaıda donordyń kelisiminsiz jasaǵanyn aıtty.

Dárigerge operatsııa kezinde sybaılasy, mamandyǵy boıynsha avtomehanık kómektesip otyrǵan. Aýrýhana naýqastary - operatsııa qurbandaryn kóbinese sol tartyp otyrǵan.

Kem degende 328 adamǵa ota jasalyp, onyń ishinde úsh donor qaıtys bolǵan.

Tergeý nátıjesi boıynsha, qylmyskerler búırekti sheteldik patsıentterge 10 mln rýpııge (120 myń dollar), al pákistandyqtarǵa 3 mln rýpııge satqan.

Mohsın Nakvı dárigerdiń buǵan deıin bes ret qamaýǵa alynǵanyn, biraq ár joly jemqorlyqqa jol bergen polıtsııa qyzmetkerleriniń kómegimen bosatylyp kete beretinin aıtty.

Búırek saýdasymen aınalysatyndar toby negizinen 13 mln halqy bar Lahor qalasynda, el astanasy Islamabadqa jaqyn Taksıla qalasynda, sondaı-aq Kashmırdiń pákistandyq bóliginde jumys istegen.

«Іs júzinde zańsyz ota men transplantatsııa jasaıtyndar budan da kóp. Bul – biz naqty anyqtaǵandar ǵana», - dedi Nakvı.

Pákistanda 2010 jyly adam músheleriniń saýdasyna zań boıynsha tyıym salynǵan. Donorlardyń dene múshelerin shetelge jappaı satýdy toqtatý úshin bılik 10 jylǵa deıin bas bostandyǵynan aıyrý jáne qomaqty aıyppul salý sııaqty qatań jazalar engizdi.

Biraq nátıje joq, halqy kedeı jáne quqyq qorǵaý organdary jemqorlyqqa belshesinen batqan Pákistanda organ saýdasy jyl ótken saıyn órkendep keledi.

Qańtar aıynda Pendjab polıtsııasy astyrtyn operatsııa kezinde joǵalǵan 14 jastaǵy balany tapqannan keıin búırek saýdasymen aınalysatyn taǵy bir topty quryqtady.