Pákistan Úndistanǵa qarsy aýqymdy áskerı operatsııa bastalǵanyn jarııalady — BAQ
Pákistan «Banıan-ýl-Marsýs» («Berik qamal») atty keń aýqymdy áskerı operatsııany bastaǵanyn habarlady. Bul týraly Geo TV telearnasy qaýipsizdik organdaryndaǵy derekkózderge silteme jasap málimdedi, dep jazdy VVS agenttigi.
Keıinirek operatsııanyń bastalǵany týraly aqparat Pákistan úkimetiniń X (burynǵy Twitter) jelisindegi resmı paraqshasynda da jarııalandy.
BAQ derekkózderine súıensek, bul operatsııa aıasynda Pákistan armııasy Úndistan aýmaǵyndaǵy birneshe strategııalyq nysanalardy kózdeýde. Habarlamada úndi-reseılik birlesken kásiporyn óndirgen BrahMos atty asa jyldam zymyrandarǵa arnalǵan qoımanyń joıylǵany aıtylǵan.
Sondaı-aq, derekkózderge sáıkes, Pákistan Úndistannyń Ýdhampýr jáne Pathankot áýe bazalaryna, armııalyq brıgada shtabyna jáne iri áskerı qoımaǵa soqqy jasaǵan.
Buǵan birneshe saǵat buryn Pákistan armııasy Úndistan tarapynan óz áýe bazalaryna zymyran shabýyly jasalǵanyn málimdep, qarsy sharalar qoldanatynyn eskertken bolatyn. Sol bazalardyń biri — Nýr Han — astana Islamabadtan 10 shaqyrym jerdegi Ravalpındı qalasynda ornalasqan. Osydan keıin el aýmaǵyndaǵy áýe keńistigi 10 mamyr kúndizgi saǵat 12:00-ge deıin jabylǵan.
Úndistandyq aqparat quraldary, sonyń ishinde Times of India gazeti, Geo TV habarlaǵan shabýyldar týraly áli resmı aqparat jarııalaǵan joq. Sondaı-aq úndi bıligi Pákistan áýe bazalaryna jasalǵan shabýyldarǵa qatysty burynǵy habarlamalarǵa túsinikteme bermegen.
Eske sala keteıik, buǵan deıin Úndistan Pákistanǵa soqqy jasaǵanyn jazǵan edik.
Úndistan men Pákistan soqqylaryn kúsheıte tústi, ntıjesinde eki tarapta da qaza tapqandar sany artty.
Artynsha Úndistannyń Pákistanǵa jasaǵan áýe shabýylynan qaza tapqandar sany 31 adamǵa jetti.
Pákistan qorǵanys mınıstrligi eki el arasyndaǵy shıelenistiń órshýi ıadrolyq soǵysqa ákelýi múmkin ekenin eskertti.
QR Syrtqy ister mınıstrligi Úndistan Respýblıkasy men Pákistan Islam Respýblıkasy arasyndaǵy jaǵdaıdyń shıelenisýine baılanysty tereń alańdaýshylyq bildirdi.