Pákistan Premeriniń Qazaqstanǵa memlekettik sapary boıynsha ekijaqty jumys toby qurylmaq

ISLAMABAD.KAZINFORM - Pákistan Premer-mınıstri eki eldiń saýda-ekonomıkalyq jáne ınvestıtsııalyq yqpaldastyǵyn tereńdetý turǵysynan búgingi bıznes forýmnyń mańyzdylyǵyna nazar aýdardy, dep habarlaıdy Aqordanyń baspasóz qyzmeti.

– Búgin biz taýar aınalymyn aldaǵy eki jylda 1 mıllıard dollarǵa jetkizý úshin barynsha áreket etýge ýaǵdalastyq. Osy maqsatqa tezirek jetý jolynda qolda bar múmkindiktiń bárin paıdalanýǵa kelistik. Bıyl dostas Qazaqstanǵa saparmen kelýge shaqyrǵany úshin qadirli baýyryma rızashylyǵymdy bildiremin. Bul shaqyrýdy zor qýanyshpen jáne erekshe yqylaspen qabyl aldym. Biz ózara jumys tobyn qurý jóninde sheshim qabyldadyq. Bul topqa ortaq saýda jáne ınvestıtsııalyq portfeldi keńeıtý jóninde besjyldyq baǵdarlamany ázirleý tapsyrylady, – dedi Shahbaz Sharıf.

Qazaqstan-Pákistan bıznes forýmynyń qorytyndysy boıynsha jalpy somasy 200 mıllıon dollarǵa jýyq 30-dan astam kommertsııalyq qujatqa qol qoıyldy.

Kelisimderde eki eldiń qarjy, logıstıka, ónerkásip, energetıka, agroónerkásip kesheni, tsıfrlandyrý jáne ınfraqurylym salalaryndaǵy yntymaqtastyǵyn keńeıtý kózdelgen.

Aıta keteıik, osyǵan deıin Qasym-Jomart Toqaev Pákistan Premer-mınıstrin Qazaqstanǵa memlekettik saparmen kelýge shaqyrǵan bolatyn.