Pákistan: Nıý-Delıdiń terakt boıynsha aıyptaýlary negizsiz

ASTANA. KAZINFORM – Úndistan bıligi radıkaldy «Lashkar-ı-Taııba» tobynyń Pákistanmen baılanysy bar ekenine qatysty eshqandaı dálel usynǵan joq. Bul týraly Pákistannyń qorǵanys mınıstri Havadja Asıf Sky News telearnasyna bergen suhbatynda málimdedi, dep jazady TASS.

Nıý-Delı bul teraktini aımaqtaǵy jaǵdaıdy turaqsyzdandyrý úshin paıdalandy, dep qosty mınıstr.

– Olar (Úndistan bıligi) Pákistandy aıyptaý úshin eshqashan naqty dálelder keltirmegen. Bul – ózderine tıimdi jaǵyn jaratýdyń amaly ǵana. Bizdiń bul iske qatysymyz joq”, – dedi vedomstvo basshysy.

Mınıstrdiń aıtýynsha, «Lashkar-ı-Taııba» toby Pákistan aýmaǵynda áreket etpeıdi. AQSh pen Úndistannyń arnaıy qyzmetteri naqty aıǵaqsyz qate qorytyndy jasaǵan. Pákistannyń qaýipsizdik organdary bul oqıǵa aldyn ala josparlanǵan áreket bolǵanyn jáne onyń maqsaty – óńirdegi turaqtylyqty buzý ekenin anyqtaǵan.

Aıta keteıik, buǵan deıin Úndistan men Pákistan shekarasynda atys bolǵanyn jazdyq.

Úndistanda týrıster jıi baratyn Pahalgamda, ıaǵnı «Úndistannyń kishkentaı Shveıtsarııasy» atalyp ketken jerde hakı tústi kıim kıgen belgisiz qarýly adamdar Baısaran ańǵarynda júrgen týrısterge oq jaýdyrǵan edi. Shabýylda 26 beıbit turǵyn qaza tapty.

Aqorda Memleket basshysynyń Úndistannyń Premer-mınıstrine kóńil aıtqanyn habarlady.

BUU Bas hatshysy Úndistandaǵy qarýly shabýyldy qatań aıyptady.

Úndistan basqaratyn Kashmırdegi tanymal týrıstik ortalyqta qarýly adamdar toby 26 adamdy óltirgennen keıin Úndistan Pákistanǵa qarsy sharalarǵa kóshti.

Djammý men Kashmır polıtsııasy Pahalgamda shabýyl jasaǵandardyń aty-jónin áshkerelep, olar týraly aqparat bergenderge syılyq jarııalady.