Pákistan men Úndistan atysty toqtatý merzimin uzartty

ASTANA. KAZINFORM — Pákistan men Úndistan, seısenbi kúni kelissóz júrgizip, atysty toqtatýdyń qazirgi rejımin 18 mamyrǵa deıin uzartý týraly kelisti, dep habarlaıdy Xinhua. 

Bul týraly Pákistan Premer-mınıstriniń orynbasary, Syrtqy ister mınıstri Ishak Dar málimdedi.

Parlamentte sóılegen sózinde ol eki eldiń áskerıleri beısenbi kúni bir-birimen baılanysyp, keıin saıası dıalogqa kóshetin atysty toqtatý kelisimin uzartý týraly sheshim qabyldaǵanyn málimdedi.

— 10 mamyrda jasalǵan atysty toqtatý týraly bastapqy kelisim 12 mamyrǵa deıin kúshinde boldy. Sodan keıin ol 14 mamyrǵa deıin, endi 18 mamyrǵa deıin uzartyldy, — dedi Ishak Dar parlament depýtattaryna.

Ol osy ýaqytqa deıin áskerı deńgeıdegi kelissózdiń atysty toqtatý rejımin saqtaýda mańyzdy ról atqarǵanyn jáne jan-jaqty saıası kelissóz 18 mamyrdan keıin bastalatynyn qosyp ótti.

— Úndistanmen jan-jaqty jáne nátıjege baǵyttalǵan kelissóz júrgiziledi. Maqsat — bireýdiń artyqshylyǵyn moıyndaý emes, máselelerdi teńdik negizinde sheshý, — dep basa aıtty Pákistan SІM basshysy.

Eki el arasyndaǵy shıelenis 7 mamyrdyń alǵashqy saǵattarynda ótken aıda Úndistannyń baqylaýyndaǵy Kashmırdegi Pahalgamda belgisiz sodyrlar 26 beıbit turǵyndy óltirgen qarýly shabýylynan keıin Úndistannyń Pákistandaǵy birneshe nysanaǵa áýe shabýyldaryn jasaǵan kezde kúsheıe tústi.

Birneshe kúnge sozylǵan keskilesken shaıqastan keıin taraptar 10 mamyrda atysty toqtatý týraly kelisimge keldi, keıin ol kezeń-kezeńimen uzartyldy.

Aıta keteıik, Úndistan men Pákistan arasyndaǵy qarym-qatynas 22 sáýir kúni Úndistannyń odaqtas Djammý men Kashmır aýmaǵyndaǵy Pahalgam qalasynda bolǵan teraktiden keıin shıelenisti. Terakt saldaryna 25 úndistandyq pen 4 nepaldyq mert boldy.