Pákistan men Úndistan arasynda soǵys bastalý qaýpi bar

ASTANA. KAZINFORM – Pákistannyń qorǵanys mınıstri Havadja Asıf aldaǵy 2-4 kún ishinde Úndistanmen soǵys bastalý qaýpi bar ekenin málimdedi. Bul týraly pákistandyq Dawn gazeti habarlady, dep jazady TASS.

– Biz moraldyq turǵydan daıyn bolýymyz kerek, aldyda soǵys qaýpi tónip tur. Ol tipti aldaǵy bir-eki, úsh nemese tórt kún ishinde bastalýy múmkin degen qaýip bar, – dedi mınıstr.

Alaıda ol óz málimdemesin soǵystyń mindetti túrde bastalatyny týraly boljam dep qabyldamaý kerek ekenin, tek aldaǵy kúnderdiń sheshýshi bolatynyn eskertkenin túsindirdi.

Havadja Asıftiń aıtýynsha, eger Pákistannyń egemendigine qaýip tónse nemese elge áskerı embargo qoıylsa, Pákistan kez kelgen áskerı áreketke 100% daıyn.

Mınıstr sondaı-aq óńirdegi basqa elder daýly jaǵdaılardy boldyrmaýǵa jáne shıelenisti azaıtýǵa kúsh salyp jatqanyn atap ótti.

22 sáýir kúni qarýly adamdar Djammý men Kashmır odaǵy aýmaǵyndaǵy áıgili týrıstik qala – Pahalgamda terrorlyq shabýyl jasaǵan bolatyn. Áskerı kıim kıgen adamdar avtomattarmen oq jaýdyrǵan, 25 úndi azamaty men 1 nepaldyq qaza tapty. Qylmyskerler oqıǵa ornynan qashyp úlgergen.

Kóptegen adam jaralandy. Shabýyldy «Qarsylyq maıdany» atty top óz moınyna aldy. Bul toptyń Pákistanda tyıym salynǵan «Lashkar-ı-Taııba» uıymyna qatysy bar. Osy oqıǵadan keıin Úndistan Pákistanmen sý týraly kelisimdi toqtatyp, Nıý-Delıdegi pákistandyq keńesshilerdiń elden ketýin talap etti. Sondaı-aq pákistandyqtarǵa berilgen vızalar da joıyldy.

Buǵan deıin Pákistan áskerıleri senbiden jeksenbige qaraǵan túni Úndistannyń Djammý jáne Kashmır odaqtyq aýmaǵyndaǵy baqylaý syzyǵynda oq jaýdyrǵanyn jazdyq.