Pákistan men Aýǵanstan shekarasynda qaıtadan atys boldy
ASTANA. KAZINFORM — Pákistan men Aýǵanstan shekarasynda taǵy da qarýly qaqtyǵystar bolyp, eki jaqtan da adam qaza tapty, jaralanǵandar da bar. Bul týraly Kazinform agenttigi TASS-qa silteme jasap habarlady.
Xinhua agenttiginiń málimetinshe, 28 qazanda Pákistan aýmaǵynan atylǵan snarıadtar Aýǵanstannyń shyǵysyndaǵy Nangarhar provıntsııasyna túsken. Saldarynan eki adam qaza taýyp, taǵy ekeýi jaralandy.
Oqıǵa «Torham» shekaralyq ótkizý beketi mańynda bolǵan.
Aýǵanstan Qorǵanys mınıstrligi de Pákistannyń tórt ushqyshsyz ushý apparaty Paktıka provıntsııasyndaǵy áskerı nysandarǵa soqqy jasaǵanyn habarlady. Buǵan jaýap retinde aýǵan áskerı qyzmetshileri Pákistan aýmaǵyna oq atqan.
Al Pákistan shekara qyzmetiniń málimetinshe, eldiń soltústik-batysyndaǵy Tómengi Ońtústik Vazırıstan aýdanynda Aýǵanstan tarapynan jasalǵan mınomet shabýyly saldarynan bir adam qaza taýyp, taǵy bes adam jaralanǵan.
Jańa qaqtyǵystar kórshiles eki el arasyndaǵy shıelenis saqtalyp otyrǵan tusta boldy.
17 qazanda da Aýǵanstan men Pákistan shekarasynda qarýly qaqtyǵys bolǵan. Islamabadtyń málimdeýinshe, Pákistan áskeri aýǵan kúshteriniń shabýylyna jaýap retinde aýyr qarý qoldanǵan.
Buǵan deıin 18 qazanda Dohada ótken kelissózder barysynda Aýǵanstan men Pákistan ókilderi shekarada atysty dereý toqtatýǵa keliskeni habarlanǵan bolatyn. Kelissózder Katar men Túrkııanyń deldaldyǵymen ótti. Taraptar eki el arasyndaǵy beıbitshilik pen turaqtylyqty nyǵaıtý tetikterin qurý jóninde de ýaǵdalasty.
