Pákistan men Aýǵanstan shekarasynda 29 sodyr kóz jumdy
ASTANA. KAZINFORM — Pákistannyń qaýipsizdik kúshteri 28 maýsymda Aýǵanstanmen shekaralas Haıber-Pahtýnhva provıntsııasynda qurlyqtaǵy arnaıy operatsııa júrgizip, 29 sodyrdyń kózin joıdy. Bul týraly Pákistannyń aqparat jáne teleradıo habarlaryn taratý mınıstri Attaýlla Tarar málimdedi, dep habarlaıdy TASS.
— Qaýipsizdik kúshteri Pákistan–Aýǵanstan shekarasy boıynda barlaý málimetteri negizinde muqııat josparlanǵan qurlyqtaǵy operatsııa júrgizdi. Odan keıin shekara mańyndaǵy «Djamaat-ýl-Ahrar» jáne «Fıtna ál-Havarıdj» toptarynyń jasyryn bazalary men lagerlerine dálme-dál soqqylar jasalyp, nátıjesinde 29 sodyrdyń kózi joıyldy, — dep jazdy Tarar H áleýmettik jelisindegi paraqshasynda.
Qurlyqtaǵy operatsııa barysynda Pákistan–Aýǵanstan shekarasy boıyndaǵy atalǵan toptardyń úsh nysanasyna shabýyl jasalyp, qarý-jaraq pen oq-dári qoımalary joıyldy.
Mınıstr Pákistannyń terrorızmge qarsy operatsııalary el qaýipsizdigine syrttan tónetin ári shetelden qoldaý kóretin kez kelgen qaterdi joıý maqsatynda tolyq qarqynmen jalǵasatynyn atap ótti.
Islam respýblıkasy Qarýly kúshteriniń qoǵammen baılanys jónindegi vedomstvoaralyq basqarmasynyń málimetinshe, qaýipsizdik kúshteri byltyr 2 597 sodyrdyń kózin joıǵan.
Osy kezeńde Pákistan aýmaǵynda 5 397 terrorıstik shabýyl tirkelip, saldarynan 1 235 adam qaza tapty. Lańkestik áreketterdiń 70 paıyzdan astamy Haıber-Pahtýnhva provıntsııasynda, al shamamen 29 paıyzy eldiń ońtústik-batysyndaǵy Belýdjıstan provıntsııasynda bolǵan. Eki óńirdiń de Aýǵanstanmen uzaq shekarasy bar. Pákistan bıliginiń málimetinshe, dál osy el aýmaǵynda terrorıstik toptardyń lagerleri ornalasqan.
