Pákistan, Qytaı jáne Frantsııa ofıtserleri Qazaqstanda áskerı bilim aldy
ASTANA. KAZINFORM- Qazaqstan Respýblıkasy Ulttyq qorǵanys ýnıversıtetinde qazaqstandyq jáne sheteldik áskerı qyzmetshilerge dıplom tapsyrýdyń saltanatty rásimi ótti, dep habarlaıdy QR Qorǵanys mınıstrliginiń baspasóz qyzmeti.
Oqýdy áskerı medıtsına, tárbıe qurylymdary, kıberqaýipsizdik jáne sport salalary mamandaryn qosa alǵanda, 50-den astam ofıtser sátti aıaqtady. Sonymen qatar, Qarýly Kúshter Bas shtaby akademııasy fakýltetiniń tórt tyńdaýshysy – Pákistan, Qytaı jáne Frantsııa áskerı qyzmetshileri dıplomǵa ıe boldy.
Saltanatty rásimge Qorǵanys mınıstrliginiń, Ulttyq qorǵanys ýnıversıtetiniń basshylyǵy, Pákistan, Qytaı jáne Frantsııanyń dıplomatııalyq mıssııalary men áskerı attasheler apparattarynyń ókilderi, professorlyq-oqytýshylyq quram, sondaı-aq túlekterdiń týystary qatysty.
Ofıtserlerdi oqýdy sátti aıaqtaýymen Qorǵanys mınıstriniń orynbasary general-maıor Asqar Mustabekov quttyqtady. Ol qazirgi zamanǵy jaǵdaılar áskerı basshylardan joǵary kásibı daıyndyqty, jedel sheshim qabyldaı bilýdi jáne olardy iske asyrý úshin jaýapkershilik kóterýdi talap etetinin atap ótti.
– Dıplom tapsyrý – kásibı damýdyń aıaqtalýy emes, áskerı qyzmettiń jańa, budan da jaýapty kezeńiniń bastalýy, – dedi Qorǵanys mınıstriniń orynbasary.
Sondaı-aq ol Ulttyq qorǵanys ýnıversıtetinde sheteldik áskerı qyzmetshilerdi daıarlaý halyqaralyq áskerı yntymaqtastyqtyń mańyzdy baǵyty ekenin, onyń túrli memleketterdiń qarýly kúshteri arasyndaǵy senimdi nyǵaıtýǵa jáne áriptestik baılanystardy damytýǵa yqpal etetinin atap ótti.
Sheteldik túlekterdiń atynan Frantsııa áskerı qyzmetshisi maıor Remı Valle sóz sóılep, ýnıversıtet basshylyǵy men professorlyq-oqytýshylyq quramǵa joǵary deńgeıdegi daıarlyq úshin alǵys bildirdi. Ol Qazaqstanda bilim alǵan jyldardyń kásibı turǵydan da, jeke ómirlik tájirıbe turǵysynan da asa qundy bolǵanyn aıtty.
Saltanatty rásim dıplomdardy tabystaýmen jáne túlekterdiń Qorǵanys mınıstrligi basshylyǵymen ári sheteldik qonaqtarmen birge estelik sýretke túsýimen aıaqtaldy.
Osyǵan deıin Qazaqstanda áskerı rezervtiń atys daıyndyǵy kúsheıtilgeni týraly jazdyq.
