Pákistan Qyrǵyz Respýblıkasyndaǵy 180 stýdentti arnaıy ushaqpen elge jetkizdi
ASTANA. KAZINFORM – Pákistan Qyrǵyzstannan 180 stýdentti arnaıy ushaqpen tasymaldady. Bul týraly PTV News habarlady.
«KA571 arnaıy reısi Qyrǵyzstannan 180 pákistandyq stýdenttiń alǵashqy partııasyn ákelip, Lahor áýejaıyna aman-esen qondy», - delingen PTV News áleýmettik jelidegi akkaýntynda.
PTV News arnasynyń habarlaýynsha, stýdentterdi áýejaıda federaldyq ishki ister mınıstri qarsy alǵan.
18 mamyrda Bishkekte sheteldikter qatysqan jappaı tóbeles boldy. Ol 13 mamyrda jataqhana qonaqtary arasyndaǵy janjaldan bastalǵan.
Keıin Qyrǵyzstan Ulttyq qaýipsizdik memlekettik komıtetiniń tóraǵasy Qamchybek Tashıev Bishkektegi túngi oqıǵaǵa qatysty túsinikteme berdi. Oqıǵa saldarynan 29 adam medıtsınalyq kómekke júginse, onyń 15-i el astanasynyń emdeý mekemelerine jetkizilgen.
Qyrǵyz Respýblıkasynyń Mınıstrler kabıneti Bishkektegi túngi oqıǵadan keıin málimdeme jasap, onda ultaralyq zorlyq-zombylyq pen tártipsizdik týdyrý áreketterin qatań aıyptady.
Pákistan premer-mınıstri Shahbaz Sharıf Bishkekte sheteldik azamattarǵa qatysty oqıǵaǵa alańdaýshylyq bildirdi.
Qazaqstan Respýblıkasynyń Ulttyq qaýipsizdik komıteti Qyrǵyzstannan Qazaqstanǵa ketýdi josparlap otyrǵan sheteldik stýdentter týraly aqparatty joqqa shyǵardy.
