Pákistan Qazaqstanda tyńaıtqysh óndirýge nıetti — Mınıstr saparynda qandaı kelisimder ornady
ISLAMABAD. KAZINFORM — QR Syrtqy ister mınıstrligi Investıtsııa komıteti tóraǵasy Ǵabıdolla Ospanqulov Qazaqstan men Pákistan arasynda ınvestıtsııalyq qatynastardyń qaı baǵytta órbıtinin aıtyp berdi jáne taýar aınalymyn 1 mlrd dollarǵa jetkizý maqsaty týraly óz pikirin bildirdi.
Onyń aıtýynsha, 250 mıllıon halqy bar Pákistannyń Qazaqstanǵa qyzyǵýshylyǵy artyp keledi. QR Syrtqy ister mınıstriniń resmı saparynda eki el arasynda saýda, logıstıka, aýyl sharýashylyǵy, IT, qarjy salalarynda 20-ǵa jýyq kelisimge qol jetkizildi.
— Eń aldymen Pákistan qazaqstandyq logıstıkalyq kompanııalarymen yntymaqtastyq qurý nıetin bildirip otyr. Bul eki tarapqa da óte paıdaly. Óıtkeni Qazaqstan men Pákistan arasynda logıstıkany durys qurar bolsaq, taýar aınalymy artady. Oǵan qosa, Pákistan kompanııalary aýyl sharýashylyǵynda tyńaıtqyshtardy paıdalanýǵa yntaly. Sondyqtan pákistandyq Fauji Group Qazaqstanda kalıı, fosfat jáne azot tyńaıtqyshtaryn óndirýdi jáne ony tereń óńdeýden ótkizip, óz eline tasymaldaý týraly kelissózder júrgizip keledi. Eger bul joba júzege assa, elimizde óndiris damıdy, ol taýardy eksporttaımyz jáne jańa jumys oryndary qurylady. Offteık kelisimsharttarmen, ıaǵnı taýardy aldyn ala satý arqyly óndiris kompanııalaryn yntalandyramyz. Bul qosymsha ınvestıtsııa, qosymsha qarajat, — dedi Ǵ. Ospanqulov agenttik tilshisine bergen suhbatynda.
Pákistandyq kásipkerler basqa da aýyl sharýashylyǵy ónimderin, sonyń ishinde kartopty Qazaqstanda ósirý jáne basqa elderge tasymaldaý máselesin de talqylaǵan.
Sonymen birge, ınvestıtsııany damytý salasynda pákistandyq tarap Qazaqstannyń logıstıkalyq ınfraqurylymyna qarjy salǵysy keledi.
— Bul arqyly biz Transkaspıı magıstralin damytamyz, Ońtústik pen Soltústikti jalǵaıtyn dáliz de damı túsedi. Munyń biz eki jolyn qarastyryp otyrmyz, birinshiden Pákistannyń Karachı porty arqyly teńizge jol ashýǵa bolady jáne qurlyq arqyly temirjoldy damytýǵa bolady, — dep atap ótti mınıstrlik ókili.
IT salasynda da Qazaqstannyń jetistikterin pákistandyq tarap qyzyǵýshylyqpen zerttep jatyr jáne óz memleketinde paıdalanǵysy keledi.
— Onyń ishinde E-Gov, memlekettiń halyqqa beretin qyzmetterin avtomattandyrý jáne tsıfrlandyrý boıynsha Qazaqstannyń jetistikteri zerdelenip jatyr. Oǵan qosa, FinTech baǵytynda — bank, qarjy salasyndaǵy qarym-qatynasty kúsheıtý arqyly tehnologııalarymyzdy transferleımiz. Bul da qazaqstandyq ónimderdiń eksportqa shyǵý áleýetiniń joǵary ekenin kórsetip otyr. Pákistandyq «Askari bank» eki eldiń bıznesiniń qarjylaı tólem júrgizetin korrespondenttik shottardy ashý úshin «Banktsentrkredıtpen» kelisim ornatyp jatyr, — dedi spıker.
Bilim berý salasyndaǵy yntymaqtastyq ta jolǵa qoıylyp keledi. Onyń ishinde medıtsınalyq oqý oryndarynyń pákistandyq stýdentterdi oqytýy, qazaqstandyq ýnıversıtetterdiń Pákistanda jumys isteýine jol ashý boıynsha kelisimder bar.
— Tasymaldaý, eki el halqynyń týrıstik almasýy boıynsha tikeleı áýe reısterin ashý máselesi de kóterildi. Óıtkeni Qazaqstan men Pákistan ýaqyt boıynsha jaqyn ornalasqan, Astanadan 3 saǵatta, Almatydan 1,5-2 saǵatta ushyp jetýge bolady. Sondyqtan osy salany damytsaq, týrıstik aǵyn da kóbeıedi. Bul úshin qos memlekettiń áýe kompanııalarymen talqylaý júrgiziledi, sebebi árbir reıs paıdaly, tıimdi bolýy kerek. Qazir eki el arasynda áýe reısi joq, — dedi Ǵ. Ospanqulov.
Spıker Qazaqstan men Pákistan arasyndaǵy taýar aınalymyn 1 mlrd dollarǵa jetkizý ábden múmkin ekenin aıtyp otyr.
— Bıznestiń kóterip otyrǵan máselesi — baılanys ornatý. ıAǵnı logıstıka, transport tasymaldaý marshrýttaryn kúsheıtýimiz kerek. Bul mýltımodaldyq baǵytta bolady, áýe, temirjol, avtokólik, oǵan qosa, teńiz arqyly tasymaldaýdy da qarastyryp otyrmyz. Taýarlyq pozıtsııalardyń sanyn da kóbeıtemiz. Byltyrǵy jylmen salystyrǵannyń ózinde qarqyndy ósim baıqalady. Qazir transporttyq logıstıkalyq marshrýttardy taǵy kúsheıte alamyz, óıtkeni birneshe logıstıkalyq kompanııalar Qazaqstanǵa kelýge múddeli. Bul Qazaqstanǵa da tıimdi. Sondyqtan eki jaqtan kólik-logıstıkalyq konsortsıým qurylsa, bul taýar aınalymyna óte jaqsy septigin tıgizedi. Shamamen 1-2 jylda 1 mlrd dollar mejesine jete alamyz, — dedi Ǵabıdolla Ospanqulov.
Budan buryn Qazaqstan men Pákistan 2025–2026 jyldarǵa arnalǵan is-sharalar josparyna qol qoıǵanyn jazǵan edik.