Pákistan qaqtyǵysty ýshyqtyrýdy kózdemeıdi — elshi Naýman Bashır Bhattı

ASTANA. KAZINFORM — Qazaqstandaǵy Pákistan Islam Respýblıkasynyń Tótenshe jáne ókiletti elshisi Naýman Bashır Bhattı elordada brıfıng ótkizip, Djammý men Kashmırdegi qazirgi ahýalǵa pikir bildirdi jáne óz eliniń resmı ustanymyn jetkizdi, dep habarlaıdy Kazinform tilshisi. 

− Pahalgamdaǵy oqıǵadan keıin Úndistannyń arandatýshy áreketteriniń saldarynan aımaǵymyzdaǵy beıbitshilik pen qaýipsizdikke eleýli qater tónip otyr. Pahalgam Úndistan zańsyz basyp alǵan Djammý men Kashmır aımaǵynda ornalasqan. BUU Qaýipsizdik Keńesiniń kóptegen qararyna sáıkes, Djammý men Kashmır halyqaralyq deńgeıde daýly aýmaq dep tanylǵan. Djammý men Kashmır máselesiniń sheshilmeýi Ońtústik Azııadaǵy turaqsyzdyqtyń basty sebebi bolyp qala beredi, — dedi elshi.

Onyń aıtýynsha, Pákistan terrorızmniń barlyq túrin aıyptaıdy. Pahalgamdaǵy oqıǵadan keıin bul el adamdar ólimi úshin alańdaýshylyq bildirip, bul isti beıtarap tergeýshilerdiń táýelsiz tekserýine shaqyrǵan.

− Biz Pahalgamdaǵy oqıǵaǵa Pákistandy baılanystyrý áreketterimen kelispeımiz. Pákistannyń bul oqıǵaǵa esh qatysy joq ári odan esh paıda tappas edi. Alaıda oqıǵadan sanaýly mınýt ótkende-aq Úndistan bizdi dálelsiz aıyptaı bastady. Áli kúnge deıin Úndistan úkimeti birde-bir naqty dáıek keltirgen joq. Bul máselege Úndistan ishinde de, halyqaralyq qaýymdastyq tarapynan da kóp suraq týyndap otyr, — dedi Naýman Bashır Bhattı.

Sonymen birge, elshi Úndistan basshylary men aqparat quraldary jyldar boıy Pákistan týraly jalǵan pikirler taratyp kele jatqanyn, Pahalgam syndy oqıǵalardy paıdalanyp, Pákistandy qaralaý arqyly saıası múddelerin ilgeriletýdi, óńirdegi ústemdikke umtylýdy, ıslamofobııalyq kózqarasty nasıhattaýdy kózdeıtinin jetkizdi.

− Úndistan Pákistan aýmaǵynda memlekettik terrorızmmen jáne maqsatty túrde kisi óltirýmen aınalysýdy jalǵastyryp keledi. Tipti, óz qylmystyq operatsııalary men terrorlyq aktilerin dáripteıdi. Pákistan Úndistan tarapynan josparlanyp, úılestirilip, qarjylandyrylatyn terrorızmge qarsy kúres júrgizip otyr. Pahalgamdaǵy oqıǵadan keıin Pákistan kúshteri eldiń batys shekarasynda jáne ishki aýmaǵynda Úndistan qoldap-qarjylandyrǵan birqatar terrorıstik áreketti der kezinde toqtatty, − dedi Naýman Bashır Bhattı.

Sondaı-aq ol Pahalgamdaǵy oqıǵadan keıin Úndistan Mınıstrler kabıneti Qaýipsizdik komıteti qabyldaǵan áreketterdi zańsyz ári asa jaýapsyz dep aıyptady. Atap aıtqanda, elshi Ind ózeni týraly kelisimdi toqtatý áreketine nazar aýdardy. Pákistan bul qadamdy halyqaralyq quqyqtyń óreskel buzylýy dep esepteıdi.

− Pákistanda 240 mıllıonnan astam halyq bar jáne elimiz ózenderdiń tómengi aǵysynda ornalasqandyqtan Ind sýy týraly kelisimmen retteletin sý aǵyndaryna táýeldi. Pákistannyń Ulttyq qaýipsizdik komıteti Ind sýy týraly kelisimde jazylǵan Pákistanǵa tıesili sý aǵysyn toqtatý nemese ózgertýge baǵyttalǵan kez kelgen áreket sondaı-aq tómengi aǵys quqyǵyn basyp alý agressııa retinde qarastyrylatynyn jáne oǵan ulttyq kúsh-qýattyń tolyq aýqymyn qoldanyp jaýap beriletinin ashyq málimdedi. Pákistan qaqtyǵysty ýshyqtyrýǵa umtylmaıdy. Alaıda sońǵy kúnderi Úndistan tarapynan jasalǵan is-qımyl men rıtorıka — asqan jaýapsyzdyq, − dedi Elshi.

Pákistan óńirlik beıbitshilik pen turaqtylyqty jaqtaıdy. Alaıda Úndistan tarapynan agressııa áreketi bolǵan jaǵdaıda, Pákistan óz egemendigi men aýmaqtyq tutastyǵyn qorǵaýǵa barynsha daıyn jáne BUU Jarǵysynyń 51-babynda bekitilgen ózin-ózi qorǵaý quqyǵyn tolyq qoldanýǵa nıetti.

Buǵan deıin BUU Qaýipsizdik Keńesiniń músheleri 2025 jylǵy 22 sáýirde Djammý men Kashmırde jasalǵan terrorıstik shabýyldy qatań túrde aıyptaǵan edi. Keńes músheleri qaza tapqandardyń otbasylaryna jáne Úndistan men Nepal úkimetterine kóńil aıtty jáne jaralanǵandardyń tezirek saýyǵyp ketýine tilek bildirdi.

Qaýipsizdik Keńesi juma kúni jarııalaǵan málimdemesinde terrorızmniń barlyq túri halyqaralyq beıbitshilik pen qaýipsizdikke tónetin eń eleýli qaterlerdiń biri bolyp qala beretinin basa aıtty. Keńes músheleri bul qylmystyq áreketti uıymdastyrýshylardy, oryndaýshylardy jáne qarjylandyrýshylardy jaýapqa tartýǵa shaqyrdy. Sondaı-aq halyqaralyq quqyq pen Qaýipsizdik Keńesiniń qararlaryna sáıkes kinálilerdi jazalaý maqsatynda barlyq memleketti belsendi yntymaqtastyq jasaýǵa úndedi.

Aıta keteıik, 22 sáýirde tanymal Pahalgam qalasynda qarýly top terakt jasaǵan bolatyn. 25 Úndistan azamaty men bir Nepal azamaty qaza taýyp, kóp adam jaralandy.

Úndistan bıligi Djammý men Kashmırde jappaı tintý júrgizip, 1500-den astam adamdy jaýap alý úshin qamaýǵa aldy. Kúdikti sodyrlarǵa tıesili 10 úı qıratyldy.

Polıtsııanyń málimetinshe, shabýyl jasady degen tórt adamnyń úsheýi anyqtaldy: ekeýi Pákistan azamaty jáne bireýi Úndistan basqaratyn Kashmır azamaty. Tórtinshi týraly ázirge aqparat joq. Tiri qalǵandardyń kóbi sodyrlardyń úndilik azamattardy arnaıy nysanaǵa alǵanyn aıtady.

Shabýylǵa jaýapkershilik Pákistandaǵy «Lashkar-e-Taıba» uıymymen baılanysy bar Resistance Front dep atalatyn shaǵyn topqa júkteldi. Alaıda keıinirek ol óziniń shabýylǵa qatysy baryn joqqa shyǵaratyn málimdeme jasady.