Pákistan halqy da aza tutty

ASTANA. KAZINFORM – HAMAS saıası bıýrosynyń tóraǵasy Ismaıl Hanııanyń qazasyna baılanysty búgin, 2 tamyzda Pákistan halqy da aza tutty. Bul týraly «Daily Pakistan» habarlady.

Eldiń túkpir-túkpirindegi meshitterde juma namazynan keıin musylman dástúri boıynsha Hanııanyń sımvoldyq jerleý rásimi ótetini habarlandy.

Ulttyq aza tutý kúnin belgileý týraly sheshim bir kún buryn Pákistan premer-mınıstri Shahbaz Sharıf pen bıleýshi koalıtsııa partııalarynyń parlamenttik fraktsııalary jetekshileriniń kezdesýinde qabyldanǵan bolatyn.

– Pákistan Izraıldiń Palestınadaǵy genotsıd kezinde Hanııanyń óltirilýin aıyptaıdy. Halyqaralyq qaýymdastyqtyń Izraıldiń Palestınada jalǵasyp jatqan jaýyzdyǵyna únsiz qalýy úlken alańdaýshylyq týǵyzady, – dedi mınıstrler kabınetiniń basshysy.

Aqparat úshin, 31 shildede HAMAS saıası keńsesiniń basshysy Hanııa men onyń bir oqqaǵary Tegerandaǵy rezıdentsııaǵa jasalǵan shabýyldan keıin qaza tapqan bolatyn. Keshe, 1 tamyzda Iran Islam Respýblıkasynyń rýhanı jetekshisi aıatolla Álı Hameneı Tegeran ýnıversıtetinde Ismaıl Hanııaǵa janaza namazyn oqydy. Hanııa búgin, 2 tamyzda Dohada jerlenedi.

Buǵan deıin Túrkııada ulttyq aza tutý kúni jarııalanǵany týraly jazǵan edik.