Pákistan Gaza sektoryna 100 tonna azyq-túlik jiberdi

ASTANA. KAZINFORM — Pákistan Gaza sektoryna 100 tonna azyq-túlik kómegin jóneltti. Bul sheshim BUU qoldaýymen jumys isteıtin baqylaý uıymy Izraıldiń shabýyldary men qorshaýynda turǵan Gazada ashtyq faktisin rastaǵannan keıin qabyldandy, dep habarlaıdy Anadoly. 

BUU qoldaıtyn baqylaý uıymy Gazadaǵy ashtyq deńgeıin azyq-túlik qaýipsizdiginiń ıntegratsııalanǵan jiktemesi (IPC) boıynsha rastaǵan soń, Pákistannyń Tótenshe jaǵdaılardy basqarý ulttyq agenttigi (NDMA) AQSh-ta ornalasqan Facebook áleýmettik jelisinde málimdeme jasady.

Málimdemede premer-mınıstr Shahbaz Sharıftiń tapsyrmasymen un, daıyn taǵamdar, maı, tosap jáne jemisterden turatyn salmaǵy 100 tonna bolatyn gýmanıtarlyq júk Lahor qalasynan Gazaǵa jóneltilgeni aıtyldy.

Bul – Pákistannan Gazaǵa jiberilgen 19-shy kómek paketi. Jalpy jetkizilgen kómektiń kólemi 1915 tonnaǵa jetti.

Izraıldiń shabýyldary men gýmanıtarlyq kómektiń kelýin shekteıtin qatań qorshaýy jaǵdaıynda Gaza sektory ashtyqtyń taralýy, sý, dári-dármek, medıtsınalyq jabdyqtar men gıgıenalyq quraldardyń jetispeýimen sıpattalatyn gýmanıtarlyq apatty bastan keshirýde.

Gaza sektorynda ásirese balalar arasynda ashtyqtan kóz jumý derekteri kóbeıip barady. Jergilikti jáne halyqaralyq uıymdar Izraıldiń «ashtyq pen shóldi qarý retinde qoldanyp otyrǵanyn» aıtady.

IPC-diń 2025 jylǵy 15 tamyzda jarııalanǵan sońǵy esebinde Gazada ashtyqtyń eń joǵary deńgeıi – 5-shi deńgeı (katastrofalyq deńgeı) jetkilikti dáleldermen rastaldy.

— 22 aıǵa sozylǵan qandy qaqtyǵystardan keıin Gaza sektoryndaǵy jarty mıllıonnan astam adam ashtyqpen, joqshylyqpen jáne ólimmen sıpattalatyn apatty jaǵdaıda ómir súrip jatyr, — delingen qujatta. 

Aıta ketelik BUU Gaza sektoryndaǵy asharshylyqty alǵash ret resmı túrde rastady.