Pákistan Gaza sektoryna 100 tonna azyq-túlik jiberdi

ASTANA. KAZINFORM - Pákistan Izraıldiń shabýyly men blokadasyna ushyraǵan Gaza sektorynda ashtyq bolyp jatqanyn Birikken Ulttar Uıymy (BUU) qoldaǵan baqylaý uıymy rastaǵannan keıin, aımaqqa 100 tonna azyq-túlik jiberdi, dep habarlaıdy Anadoly.

BUU qoldaýymen jumys isteıtin baqylaý uıymy Integratsııalanǵan azyq-túlik qaýipsizdigin jikteý shkalasy (IPC) boıynsha Gazadaǵy ashtyq týraly esebin jarııalaǵan soń, Pákistannyń Tótenshe jaǵdaılardy basqarý ulttyq agenttigi (NDMA) AQSh-ta ornalasqan Facebook áleýmettik jelisi arqyly málimdeme jasady.

Málimdemede premer-mınıstr Shahbaz Sharıftiń tapsyrmasymen daıyndalǵan 100 tonna júk Lahor qalasynan jóneltilgeni aıtyldy. Júk quramyna un, daıyn taǵamdar, maı, tosap jáne jemister bar.

Bul – Pákistan jibergen 19-shy gýmanıtarlyq kómek partııasy. Jalpy kólemi 1915 tonna.

Izraıldiń áskerı shabýyldary men qatań blokadasy saldarynan Gaza sektory gýmanıtarlyq apatty bastan keshirip otyr. Aımaqta ashtyq, aýyzsý tapshylyǵy, dári-dármek, medıtsınalyq qural-jabdyq pen gıgıenalyq zattar jetpeı jatyr.

Gaza sektorynda ásirese balalar arasynda ashtyqtan ólý jaǵdaılary kóbeıdi. Jergilikti jáne halyqaralyq uıymdar Izraıldiń «ashtyq pen shóldi qarý retinde qoldanyp otyrǵanyn» málimdeýde.

2025 jylǵy 15 tamyzda jarııalanǵan IPC esebinde Gaza qalasyndaǵy ashtyqtyń 5-deńgeı (katastrofalyq deńgeı) rastalǵany aıtyldy. «22 aıǵa sozylǵan qaqtyǵystardan keıin 500 myńnan astam adam ashtyq, kedeılik jáne ólimmen sıpattalatyn apattyq jaǵdaıda ómir súrip jatyr» delingen qujatta.

Osyǵan deıin Dúnıejúzilik densaýlyq saqtaý uıymy Gazadaǵy 15 600-den astam naýqas medıtsınalyq evakýatsııaǵa muqtaj ekeni týraly habarlaǵan bolatyn.