Pákistan: Belýdjıstandaǵy terakt qurbandarynyń sany 73 adamǵa jetti

ISLAMABAD. KAZINFORM – Keshe, 26 tamyzǵa qaraǵan túni Pákistannyń ońtústik-batysyndaǵy Belýdjıstan provıntsııasynda bolǵan lańkestik áreketterdiń saldarynan qaza tapqandar sany 73-ke jetti. Bul týraly Reuters habarlady.

Bul shabýyldar port pen altyn-mys kenishi sııaqty Qytaıdyń iri jobalary ornalasqan resýrstarǵa baı ońtústik-batys provıntsııasyn bólýge májbúrleý úshin ondaǵan jyldar boıy kóterilis júrgizgen etnıkalyq sodyrlardyń sońǵy jyldardaǵy eń irisi boldy.

– Bul shabýyldar Pákistanda anarhııa qurýdyń jaqsy oılastyrylǵan jospary, - dedi Іshki ister mınıstri Mohsın Nakvı.

Pákistan áskerıleri úlken tas jolda avtobýstar men júk kólikterine jasalǵan eń iri shabýyldan keıingi shaıqasta 14 sarbaz ben polıtsııa jáne 21 sodyrdyń qaza tapqanyn habarlady.

Belýdjıstannyń bas mınıstri 38 beıbit turǵynnyń da qaza tapqanyn aıtty. Jergilikti bıliktiń habarlaýynsha, jolaýshylardyń jeke kýálikterin teksergennen keıin qarýly adamdar kóbisin atyp tastap, kólikterin órtep jibegen. Olardyń 23-i jol boıyndaǵy shabýylda qaza tapqan.

– Adamdardy avtobýstardan túsirip, otbasylarynyń kózinshe óltirdi, – dedi bas mınıstr Sarfraz Býgtı teledıdardaǵy baspasóz máslıhatynda.

– Provıntsııa astanasyn Pákistannyń qalǵan bóligimen baılanystyratyn temirjol kópirindegi jarylystan keıin Kvettaǵa temirjol qatynasy toqtatyldy. Sodyrlar kórshiles Iranmen temirjol qatynasyna da shabýyl jasady, – dep habarlady temir jol ókili Muhammad Kashıf.

Polıtsııanyń habarlaýynsha, olar temirjol kópirindegi shabýyl bolǵan jerdiń mańynda áli belgisiz alty máıitti tapqan.

«Harýf» nemese «qara jeldi daýyl» dep ataǵan operatsııa úshin jaýapkershilikti Belýdjıstandy azat etý armııasy (BLA) sodyrlary óz moınyna aldy.

Aıta keteıik, buǵan deıin Pákistanda qarýly adamdardyń shabýylynan keminde 38 adam qaza tapqanyn jazǵan edik.