Pákistan Aýǵanstandaǵy tálipter úkimetine soǵys jarııalady

ASTANA. KAZINFORM – Pákistan 27 aqpanǵa qaraǵan túni Aýǵanstannyń birneshe qalasyna, sonyń ishinde astanasy Kabýlǵa áýeden shabýyl jasady, dep habarlaıdy Kazinform.

Soqqylar tálipterdiń shekara boıyndaǵy birneshe sektordaǵy bekinisterine, shtab-páterlerine jáne oq-dári qoımalaryna áýeden jáne jerden baǵyttaldy.

Al Jazeera habarlaýynsha, Pákistannyń áskerı ushaqtary Aýǵanstannyń ońtústigindegi Kandagar provıntsııasynda ornalasqan áskerı bazaǵa da soqqy jasady. Pákistannyń qorǵanys mınıstri Hodja Asıf buny aýǵan kúshteriniń ortaq shekara boıyndaǵy shabýyldarynan keıin májbúrli shabýyl dep sıpattady.

- Pákistannyń ótkendegi róli pozıtıvti boldy. 50 jyl boıy ol bes mıllıon aýǵandyqty qabyldady. Tipti búgin de mıllıondaǵan aýǵandyq bizdiń jerimizde kún kórip otyr. Bizdiń shydamymyz taýsyldy. Endi aramyzda ashyq soǵys bastaldy, - dep málimdedi ol.

Islamabad 133 aýǵan sodyrynyń óltirilgenin habarlady. Budan basqa tálipterdiń toǵyz pozıtsııasy basyp alyndy, taǵy 27-si joıyldy.

Aýǵanstan úkimetiniń baspasóz hatshysy Zabıhýlla Mýdjahıd Pákistan tarapynan jasalǵan sońǵy shabýyldardan keıin Aýǵanstannyń Kandagar men Gelmandtaǵy Pákistan áskerı bazalaryna shabýyldaryn bastaǵanyn málimdedi.

Saldarynan 10 pákistandyq sarbaz qaza taýyp, 13 bekinis basyp alyndy.

Kabýldyń málimdeýinshe, bul jeksenbi kúni Pákistannyń shekara aımaǵyndaǵy aýǵan pozıtsııalaryna jasaǵan shabýyldaryna jaýap ekenin málimdedi.

2611 shaqyrymǵa sozylǵan ortaq shekarasy bar Pákistan men Aýǵanstan arasyndaǵy qarym-qatynas qazan aıynda eki taraptan 70-ten astam adamnyń qaza bolýyna ákelgen qaqtyǵystan keıin kúrt buzyldy.

Islamabad Kabýldy aýǵan bıligi Pákistan tálipterin qosa alǵanda qarýly toptardyń Pákistanǵa shabýyldardy daıyndaý jáne júzege asyrý úshin óz aýmaǵyn paıdalanýǵa ruqsat bergeni úshin aıyptap otyr.

Talıban bul aıypty joqqa shyǵaryp, Pákistannyń qaýipsizdigi ishki másele ekenin málimdedi.

Eske sala ketsek, Aýǵanstanda bılik júrgizip otyrǵan «Talıban» qozǵalysynyń ókilderi Pákistanǵa qarsy keń aýqymdy shabýyl operatsııasy bastalǵanyn málimdedi.

Osyǵan deıin Pákistanda qarýly shabýyl saldarynan 7 adam mert boldy.