Pákistan-Aýǵanstan shekarasynda taǵy áskerı qaqtyǵys boldy

ASTANA. KAZINFORM – Pákistan armııasy baqylaý-ótkizý beketterine jasalǵan shabýylǵa jaýap retinde Aýǵanstandaǵy lańkesterdiń pozıtsııalaryna soqqy berdi, dep habarlaıdy TASS aqparat agenttigi. 

Agenttik málimetinshe, 14 qazan kúni keshke «Talıban» qozǵalysynyń kúshteri men «Fıtna ál-Havarıdj» («Pákistandaǵy tálipter qozǵalysy») sodyrlary Pákistannyń shekara beketterine sebepsiz oq jaýdyrǵan.

Pákistan armııasynyń jaýap qaıtarý áreketi kezinde bir baqylaý-ótkizý pýnkti men tank atý bekinisi joıyldy. Qaqtyǵys kezinde «Fıtna ál-Havarıdj» tobynyń joǵary shendi qolbasshysy da qaza tapqany habarlandy.

Buǵan deıin Aýǵanstan men Pákistan shekarasyndaǵy Paktııa provıntsııasynda eki eldiń shekaralyq kúshteri arasynda qaqtyǵys bolǵanyn jazǵan edik. 

Pákistan qarýly kúshteri Aýǵanstanmen shekaradaǵy qaqtyǵystan 23 sarbazdyń mert bolǵanyn habarlady. 

Pákistandyq BAQ-tyń habarlaýynsha, Aýǵanstan kúshteri shekaradaǵy Kýrram aýdanynda ornalasqan pákistandyq áskerge «negizsiz» shabýyl jasaǵan.