Pákistan aýǵan bosqyndary úshin «Torkham» baqylaý beketin ashty

ASTANA. KAZNFORM – Pákistan aýǵandyq bosqyndardyń eline oralýyna múmkindik jasaý úshin eldiń solústik-batysyndaǵy Haıber-Pahtýnhva provıntsııasyndaǵy «Torkham» baqylaý beketin ashty. Bul týraly eldiń resmı tulǵalary senbi kúni málim etti, dep habarlaıdy Sınhýa.

Okrýg komıssarynyń orynbasary Haıber Bılal Rao BAQ ókilderine baqylaý beketiniń jumysyn senbi kúni tań ata qaıta jandandyrǵanyn atap ótti. Bul Pákistan jaǵynda aptalap kútip júrgen aýǵan azamattarynyń eline oralýyna múmkindik jasaý úshin jasalyp otyrǵan shara.

Onyń sózinshe, júzdegen aýǵan azamattary olarǵa shekaradan ótýge ruqsat berilerden buryn qujattardy rásimdeý úshin ımıgratsııalyq ortalyqqa jınalǵan.

Repatrıatsııa protsesi 11 qazan, ıaǵnı Pákistan men Aýǵanstan arasynda qaqtyǵys bolyp, Islamabad saýda jáne jolaýshylarǵa arnalǵan barlyq ótkelderdi jaýyp tastaǵan kúni toqtatyldy.

19 qazan kúni Dohada atysty toqtatý týraly resmı kelisim jasaldy.

Alaıda Syrtqy ister mınıstrliginiń resmı ókili Tahır Hýsseın Andrabı juma kúni ótken brıfıngte kommertsııalyq qyzmetti jańǵyrtý jumystary qaýipsizdikke baılanysty ekenin aıtyp, saýda úshin shekara ázirge jabyq bolatynyn málimdegen.

Shekaranyń jabylýy saldarynan birneshe apta boıy saýda júrgizilgen joq. Sonyń saldarynan Pákistannyń keıbir aýdandarynda birinshi kezekte qajet keıbir taýar túrleriniń baǵasy ósip ketti.