Pákistan armııasy sodyrlarǵa qarsy 40 myńnan astam operatsııa júrgizdi
ASTANA. KAZINFORM – Pákistanda bıyl sodyrlarǵa qarsy 40 myńnan astam arnaıy operatsııa júrgizilip, 2 084 sodyrdyń kózi joıyldy. Bul týraly Anadolu agenttigi habarlady.
Pákistan armııasynyń málimetinshe, qaýipsizdik kúshteri jyl basynan beri el aýmaǵynda 40 myńnan astam operatsııa ótkizgen.
Business Insider basylymynyń habarlaýynsha, bul týraly Pákistan armııasynyń qoǵammen baılanys basqarmasynyń bas dırektory, general-leıtenant Ahmed Sherıf Chaýdrı baspasóz máslıhatynda málimdedi.
Onyń aıtýynsha, sodyr toptarǵa qarsy kúres aldaǵy ýaqytta da jalǵasady.
Ahmed Sherıf Chaýdrı Belýdjıstan provıntsııasyndaǵy qaýipsizdik jaǵdaıyna qatysty «jaǵymsyz pikirlerdi joqqa shyǵaryp», armııa men úkimet óńirdiń damýyna baǵyttalǵan jobalardy birlesip júzege asyryp jatqanyn, olardyń jergilikti halyqqa paıda ákeletinin aıtty.
Bıyl el boıynsha sodyrlar jasaǵan 3 myńnan astam qarýly shabýyl saldarynan búgingi kúnge deıin 819 adam qaza tapqan. Olardyń 303-i áskerı qyzmetker, 194-i polıtsııa qyzmetkeri, al 322-si beıbit turǵyn.
Basylymnyń málimetinshe, Pákistandaǵy qarýly shabýyldardyń basym bóligi Aýǵanstanmen shektesetin Haıber-Pahtýnhva jáne Belýdjıstan provıntsııalarynda bolady.
Bul eki óńirde pýshtýndar men belýdjderdiń quqyqtaryn qorǵaımyz dep málimdeıtin qarýly toptar Pákistannyń qaýipsizdik kúshteri men beıbit turǵyndarǵa shabýyl jasap keledi.
Islamabad «Pákistan Talıban qozǵalysy» (TTP) Aýǵanstan aýmaǵynda ornalasyp, shabýyldardy sol jerden uıymdastyrady dep málimdeıdi. Alaıda Aýǵanstan bıligi bul aıyptaýlardy joqqa shyǵarady.
Belýdjıstanda negizinen «Belýdjıstandy azat etý armııasynyń» (BÁA) shabýyldary jıilegen. Bul uıym Belýdjıstan provıntsııasyn Pákistan quramynan bólip shyǵaryp, óńirdi belýdj halqynyń basqarýyna berýdi kózdeıdi.
Eske sala ketsek, buǵan deıin Pákistan men Aýǵanstan shekarasynda 29 sodyr kóz jumǵany habarlandy.
