Pákistan alǵash ret AQSh-tan munaı ımporttamaq

ASTANA. KAZINFORM — Pákistannyń eń iri munaı óńdeý kompanııasy – Cnergyico 2024 jyldyń qazan aıynda West Texas Intermediate (WTI) markaly 1 mıllıon barrel amerıkalyq munaı ımporttamaq. Bul týraly AZƏRTAC habarlaıdy.

Agenttik málimetinshe, shıkizat partııasy jahandyq Vitol treıderi arqyly satyp alynǵan. Bul týraly Reuters agenttigine Cnergyico kompanııasy basshysynyń orynbasary Ýsama Kýreshı málim etti.

— Bul — Vitol kompanııasymen jasalǵan uzaq merzimdi kelisimimiz aıasyndaǵy synaq partııasy. Eger ol kommertsııalyq turǵyda tıimdi jáne qoljetimdi bolyp shyqsa, biz aı saıyn osyndaı bir partııadan ımporttaýǵa daıynbyz, — dedi ol.

Munaı kelisimi AQSh Prezıdenti Donald Tramptyń Pákistan eksportyna qatysty baj salyǵyn edáýir arttyrý týraly málimdemesinen keıin birneshe aı ótken soń jasalǵan. Osy málimdemeden keıin Islamabad pen Vashıngton arasynda energetıkalyq jáne saýda baılanystaryn keńeıtýge kúsh salynǵany atap ótiledi.

Pákistannyń amerıkalyq munaıdy alǵash ret satyp alýy ıslam respýblıkasynyń Taıaý Shyǵystaǵy dástúrli munaı jetkizýshilerine táýeldiliginen mańyzdy túrde alshaqtaı bastaǵanyn bildiredi. Munaı — Pákistannyń ımportyndaǵy eń iri bap. 2024–2025 qarjy jyly (30 maýsymda aıaqtalǵan) ishinde munaı ımporty 11,3 mlrd AQSh dollaryna jetip, el ımportynyń 20%-y boldy. 

Aıta ketelik Pákistandaǵy mýsson jaýyny saldarynan 279 adam qaza tapqan edi.